ಜಪಾನ್‌ ನ ಐಚಿಯಲ್ಲಿ ನಡೆಯುತ್ತಿರುವ 2026ರ ಏಷ್ಯನ್ ಕ್ರೀಡಾಕೂಟದಲ್ಲಿ (Asian Games 2026) ಭಾರತೀಯ ಬಾಕ್ಸರ್‌ ಗಳು ಅದ್ಭುತ ಪ್ರದರ್ಶನ ನೀಡುವ ಮೂಲಕ ಇತಿಹಾಸ ನಿರ್ಮಿಸಿದ್ದಾರೆ. ಭಾರತವು ಒಟ್ಟು ಮೂರು ಚಿನ್ನ ಮತ್ತು ಮೂರು ಕಂಚಿನ ಪದಕಗಳೊಂದಿಗೆ ತನ್ನ ಅತ್ಯಂತ ಯಶಸ್ವಿ ಏಷ್ಯನ್ ಕ್ರೀಡಾಕೂಟದ ಬಾಕ್ಸಿಂಗ್ ಅಭಿಯಾನವನ್ನು ಯಶಸ್ವಿಯಾಗಿ ಮುಕ್ತಾಯಗೊಳಿಸಿದೆ.

ಹುಟ್ಟುಹಬ್ಬದಂದೇ ಚಿನ್ನ ಗೆದ್ದ ಲವ್ಲಿನಾ ಬೊರ್ಗೊಹೈನ್:

ಮಹಿಳೆಯರ 75 ಕೆಜಿ ವಿಭಾಗದಲ್ಲಿ ಕಣಕ್ಕಿಳಿದ ಒಲಿಂಪಿಕ್ ಪದಕ ವಿಜೇತೆ ಲವ್ಲಿನಾ ಬೊರ್ಗೊಹೈನ್ ತಮ್ಮ 29ನೇ ಹುಟ್ಟುಹಬ್ಬದ ದಿನದಂದೇ ಚಿನ್ನದ ಪದಕವನ್ನು ತಮ್ಮದಾಗಿಸಿಕೊಂಡರು. ಫೈನಲ್ ಪಂದ್ಯದಲ್ಲಿ ಚೀನಾದ ಜಿಯಿ ಬಾವೊ (Ziyi Bao) ವಿರುದ್ಧ 5–0 ಅಂತರದ ಸರ್ವಾನುಮತದ ನಿರ್ಧಾರದಿಂದ ಭರ್ಜರಿ ಜಯ ಸಾಧಿಸಿದರು. 2023ರ ಹಂಗ್ಝೌ ಕ್ರೀಡಾಕೂಟದ ಬೆಳ್ಳಿ ಪದಕವನ್ನು ಈ ಬಾರಿ ಚಿನ್ನವನ್ನಾಗಿ ಮೇಲ್ದರ್ಜೆಗೇರಿಸಿಕೊಂಡ ಲವ್ಲಿನಾ, 2014ರ ಇಂಚಿಯಾನ್ ಕ್ರೀಡಾಕೂಟದಲ್ಲಿ ಮೇರಿ ಕೋಮ್ ನಂತರ ಏಷ್ಯನ್ ಕ್ರೀಡಾಕೂಟದಲ್ಲಿ ಚಿನ್ನ ಗೆದ್ದ ಎರಡನೇ ಭಾರತೀಯ ಮಹಿಳಾ ಬಾಕ್ಸರ್ ಎಂಬ ಕೀರ್ತಿಗೆ ಪಾತ್ರರಾದರು.

ಪ್ರವೀಣ್ ಹೂಡಾ ಮತ್ತು ಅಂಕುಶ್ ಪಾಂಗಲ್ ಅವರಿಂದಲೂ ಚಿನ್ನದ ಕಮಾಲ್:

ಪ್ರವೀಣ್ ಹೂಡಾ: ಮಹಿಳೆಯರ 65 ಕೆಜಿ ವಿಭಾಗದ ಫೈನಲ್‌ ನಲ್ಲಿ ಪ್ಯಾರಿಸ್ 2024 ಒಲಿಂಪಿಕ್ಸ್ ಕಂಚಿನ ಪದಕ ವಿಜೇತೆ ಹಾಗೂ ಚೈನೀಸ್ ತೈಪೆಯ ಬಲಿಷ್ಠ ಆಟಗಾರ್ತಿ ಚೆನ್ ನಿಯೆನ್-ಚಿನ್ ಅವರನ್ನು 3-2 ರ ರೋಚಕ ಅಂತರದಲ್ಲಿ ಮಣಿಸಿ ಚಿನ್ನದ ಪದಕವನ್ನು ಮುಡಿಗೇರಿಸಿಕೊಂಡರು.

ಅಂಕುಶ್ ಪಾಂಗಲ್: ಪುರುಷರ 80 ಕೆಜಿ ವಿಭಾಗದ ಫೈನಲ್‌ನಲ್ಲಿ ದಕ್ಷಿಣ ಕೊರಿಯಾದ ಕಿಮ್ ಮಿನ್-ಸಿಯೋಂಗ್ ವಿರುದ್ಧ ಅತ್ಯುತ್ತಮ ಪ್ರದರ್ಶನ ನೀಡಿ 4-0 ಅಂತರದಲ್ಲಿ ಜಯಗಳಿಸಿ ಚಿನ್ನದ ಪದಕ ಪಡೆದರು. ಇವರು ಏಷ್ಯನ್ ಕ್ರೀಡಾಕೂಟದಲ್ಲಿ ಚಿನ್ನ ಗೆದ್ದ 8ನೇ ಭಾರತೀಯ ಪುರುಷ ಬಾಕ್ಸರ್ ಎನಿಸಿಕೊಂಡಿದ್ದಾರೆ.

ಕಂಚಿನ ಪದಕಗಳನ್ನು ಗೆದ್ದ ಇತರರು:

ಈ ಮೂವರ ಚಿನ್ನದ ಪದಕಗಳಲ್ಲದೆ, ಭಾರತದ ಇತರ ಬಾಕ್ಸರ್‌ಗಳು ಕೂಡ ಅತ್ಯುತ್ತಮ ಪ್ರದರ್ಶನ ನೀಡಿ ಕಂಚಿನ ಪದಕಗಳನ್ನು ಜಯಿಸಿದ್ದಾರೆ:

• ಕಪಿಲ್ ಪೋಖರಿಯಾ (ಪುರುಷರ 90 ಕೆಜಿ)
• ನರೇಂದರ್ ಬೆರ್ವಾಲ್ (ಪುರುಷರ +90 ಕೆಜಿ)
• ಪ್ರಿಯಾ ಘಂಗಾಸ್ (ಮಹಿಳೆಯರ 60 ಕೆಜಿ)

ಒಟ್ಟಾರೆಯಾಗಿ 3 ಚಿನ್ನ ಮತ್ತು 3 ಕಂಚು ಸೇರಿದಂತೆ ಒಟ್ಟು 6 ಪದಕಗಳನ್ನು ಗೆಲ್ಲುವ ಮೂಲಕ ಭಾರತೀಯ ಬಾಕ್ಸಿಂಗ್ ತಂಡವು ಏಷ್ಯನ್ ಕ್ರೀಡಾಕೂಟದ ಇತಿಹಾಸದಲ್ಲೇ ಅತ್ಯುತ್ತಮ ಹಾಗೂ ನೂತನ ದಾಖಲೆಯ ಪ್ರದರ್ಶನವನ್ನು ದಾಖಲಿಸಿದೆ.