ಪಪುವಾ: ಇಂಡೋನೇಷ್ಯಾದ ಪಪುವಾ ಪ್ರದೇಶದಲ್ಲಿ ನಡೆದ ಆಘಾತಕಾರಿ ಘಟನೆಯೊಂದರಲ್ಲಿ, ಅಮೆರಿಕಾದ ಪೈಲಟ್ ಒಬ್ಬರನ್ನು ಶೂಟ್ ಮಾಡಿ ಕೊಲೆಗೈದು, ನಾಗರಿಕ ವಿಮಾನಕ್ಕೆ ಬೆಂಕಿ ಹಚ್ಚಿರುವುದಾಗಿ ಪ್ರತ್ಯೇಕತಾವಾದಿ ಬಂಡುಕೋರರು ಪ್ರತಿಪಾದಿಸಿದ್ದಾರೆ. ಈ ದಾಳಿಯು ಅಮೆರಿಕಾ ಮತ್ತು ಇಂಡೋನೇಷ್ಯಾ ಸರ್ಕಾರಗಳಿಗೆ ನಾವು ನೀಡಿದ ‘ಸಂದೇಶ’ ಎಂದು ಬಂಡುಕೋರರ ಸಂಘಟನೆ ಘೋಷಿಸಿದೆ.

ಪಪುವಾದ ಪ್ರತ್ಯೇಕತಾವಾದಿ ಸಶಸ್ತ್ರ ಗುಂಪಾದ ‘ವೆಸ್ಟ್ ಪಪುವಾ ನ್ಯಾಷನಲ್ ಲಿಬರೇಶನ್ ಆರ್ಮಿ’ (TPNPB), ತಾವು ನಿಕೋಲಸ್ ಎಫ್. ಗೊಸ್ಸೆಲಿನ್ (Nicholas F. Gosselin) ಎಂಬ ಅಮೆರಿಕನ್ ಪೈಲಟ್ನನ್ನು ಗುಂಡಿಕ್ಕಿ ಕೊಂದಿರುವುದಾಗಿ ತಿಳಿಸಿದೆ.

ಬೆಟ್ಟದಂತಿರುವ ಹೈಲ್ಯಾಂಡ್ ಪಪುವಾದ ಯಾಹುಕಿಮೊ (Yahukimo) ಜಿಲ್ಲೆಯಲ್ಲಿ ವಿಮಾನವು ಇಳಿದ ತಕ್ಷಣ ಅದಕ್ಕೆ ಬೆಂಕಿ ಹಚ್ಚಲಾಗಿದೆ. ಈ ವಿಮಾನವು ಇಂಡೋನೇಷ್ಯಾದ ಮಿಲಿಟರಿ ಸಿಬ್ಬಂದಿಯನ್ನು ಸಂಘರ್ಷದ ವಲಯಕ್ಕೆ ಸಾಗಿಸುತ್ತಿತ್ತು ಎಂದು ಬಂಡುಕೋರರು ಆರೋಪಿಸಿದ್ದಾರೆ.

ಬಂಡುಕೋರರ ಸಂಘಟನೆಯ ವಕ್ತಾರ ಸೆಬ್ಬಿ ಸ್ಯಾಂಬೊಮ್ ಮಾತನಾಡಿ, “ನಮ್ಮ ಎಚ್ಚರಿಕೆಯನ್ನು ಮೀರಿ ನಾಗರಿಕ ವಿಮಾನಗಳನ್ನು ಮಿಲಿಟರಿ ಕಾರ್ಯಾಚರಣೆಗೆ ಬಳಸುತ್ತಿರುವುದರಿಂದ ಈ ದಾಳಿ ನಡೆಸಲಾಗಿದೆ. ಪಪುವಾ ಸಂಘರ್ಷದ ಮೂಲ ಕಾರಣಗಳನ್ನು ಪರಿಹರಿಸಲು ವಿಫಲವಾಗಿರುವ ಇಂಡೋನೇಷ್ಯಾ ಮತ್ತು ಯುಎಸ್ ಸರ್ಕಾರಗಳಿಗೆ ಇದು ನೇರ ಸಂದೇಶ” ಎಂದು ಹೇಳಿದ್ದಾರೆ. ಬಂಡುಕೋರರು ಬಿಡುಗಡೆ ಮಾಡಿರುವ ವಿಡಿಯೋದಲ್ಲಿ ಅವರು ತಮ್ಮ ಸ್ವಾತಂತ್ರ್ಯದ ಸಂಕೇತವಾದ ‘ಮಾರ್ನಿಂಗ್ ಸ್ಟಾರ್’ ಧ್ವಜವನ್ನು ಹಿಡಿದು ನಿಂತಿರುವುದು ಕಂಡುಬಂದಿದೆ.

ಇಂಡೋನೇಷ್ಯಾದ ಪೊಲೀಸ್ ಮತ್ತು ಮಿಲಿಟರಿಯ ಜಂಟಿ ಕಾರ್ಯಪಡೆಯು ಯಾಹುಕಿಮೊ ವಿಮಾನ ನಿಲ್ದಾಣದಲ್ಲಿ ವಿಮಾನವೊಂದು ಸುಟ್ಟು ಕರಕಲಾಗಿರುವುದನ್ನು ಖಚಿತಪಡಿಸಿದೆ. ಈ ವಿಮಾನವು ‘ಪಿಟಿ ಎಎಂಎ’ (PT AMA) ಸಂಸ್ಥೆಗೆ ಸೇರಿದ್ದು, ಅಗತ್ಯ ವಸ್ತುಗಳು ಹಾಗೂ ಮೇಲ್ ಸಾಗಣೆಗೆ ಬಳಕೆಯಾಗುತ್ತಿತ್ತು. ಘಟನೆಯ ವೇಳೆ ವಿಮಾನದಲ್ಲಿ ಒಬ್ಬ ಪೈಲಟ್ ಮತ್ತು ಏಳು ಪಪುವನ್ ಪ್ರಯಾಣಿಕರಿದ್ದರು ಎಂದು ಸಾರಿಗೆ ಸಚಿವಾಲಯ ತಿಳಿಸಿದೆ. ಆದಾಗ್ಯೂ, ಪೈಲಟ್ ಸಾವನ್ನಪ್ಪಿದ್ದಾರೆಯೇ ಅಥವಾ ಬಂಡುಕೋರರೇ ಈ ದಾಳಿ ನಡೆಸಿದ್ದಾರೆಯೇ ಎಂಬುದನ್ನು ತಕ್ಷಣವೇ ಅಧಿಕೃತವಾಗಿ ದೃಢೀಕರಿಸಲು ಸಾಧ್ಯವಾಗಿಲ್ಲ ಎಂದು ಭದ್ರತಾ ಅಧಿಕಾರಿಗಳು ತಿಳಿಸಿದ್ದಾರೆ.

ಈ ಭಾಗದಲ್ಲಿ ಕಳೆದ ವರ್ಷವೂ ನ್ಯೂಜಿಲೆಂಡ್ನ ಪೈಲಟ್ ಫಿಲಿಪ್ ಮೆಹರ್ಟೆನ್ಸ್ ಅವರನ್ನು ಬಂಡುಕೋರರು ಅಪಹರಿಸಿದ್ದು, ಹಲವು ತಿಂಗಳ ಸರೆವಾಸದ ಬಳಿಕ 2024 ರಲ್ಲಿ ಬಿಡುಗಡೆ ಮಾಡಲಾಗಿತ್ತು. ಪ್ರಸ್ತುತ ಬಂಡುಕೋರರು ಇಂಡೋನೇಷ್ಯಾದ ಅಧ್ಯಕ್ಷ ಪ್ರಬೊವೊ ಸುಬಿಯಾಂತೊ ಅವರಿಗೆ ವಿಶ್ವಸಂಸ್ಥೆಯ ಮಧ್ಯಸ್ಥಿಕೆಯಲ್ಲಿ ಅಂತರರಾಷ್ಟ್ರೀಯ ಮಟ್ಟದ ಮಾತುಕತೆ ಆರಂಭಿಸುವಂತೆ ಒತ್ತಾಯಿಸಿದ್ದಾರೆ.

ಜಾಗತಿಕ ಕನ್ನಡಿಗರ ಅಚ್ಚುಮೆಚ್ಚಿನ ಸುದ್ದಿತಾಣ ಮಹಾನಾಯಕ ಸುದ್ದಿಗಳನ್ನು ನಿಮ್ಮ ವಾಟ್ಸಾಪ್ ಗ್ರೂಪ್ ಗಳಿಗೆ ಕಳುಹಿಸಬೇಕೇ? ಹಾಗಿದ್ದರೆ, ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 9686399493 ನಂಬರ್ ಸೇರಿಸಿ.

ಗ್ರೂಪ್ ಗೆ ಜಾಯಿನ್ ಆಗಿ:

https://chat.whatsapp.com/H1duNIQRfXnJcfQKWPzNqD