ಮೀನು ಪ್ರಿಯರಿಗೆ, ಅದರಲ್ಲೂ ವಿಶೇಷವಾಗಿ ಕೇರಳದ ಶೈಲಿಯ ಅಡುಗೆಯನ್ನು ಇಷ್ಟಪಡುವವರಿಗೆ  ಬೂತಾಯಿ — ಮತ್ತಿ (ಸಾರ್ದಿನ್) ಮೀನು ಎಂದರೆ ಅಚ್ಚುಮೆಚ್ಚು. ಇದು ಕೇವಲ ರುಚಿಯಷ್ಟೇ ಅಲ್ಲದೆ ಆರೋಗ್ಯಕ್ಕೂ ಉತ್ತಮ. ಇತ್ತೀಚೆಗೆ ಕೇರಳದ ಮನೆಗಳಲ್ಲಿ ಜನಪ್ರಿಯವಾಗಿರುವ ಬೂತಾಯಿ ಮೀನಿನ ಫ್ರೈ ಹಾಗೂ ಬ್ಯಾಚುಲರ್ಸ್‌ ಕೂಡ ಸುಲಭವಾಗಿ ಮಾಡಬಹುದಾದ ಬೂತಾಯಿ ಮೀನಿನ ಕರಿಯನ್ನು ಮಾಡುವ ಸರಳ ವಿಧಾನಗಳು ಇಲ್ಲಿವೆ.

ಬೂತಾಯಿ–ಮೀನಿನ ಫ್ರೈ (Sardine Fry):

ತಯಾರಿ: ಮೊದಲು ಮೀನಿಗೆ ಅಚ್ಚಖಾರದ ಪುಡಿ, ಅರಿಶಿನ ಮತ್ತು ಉಪ್ಪು ಸವರಿ 30 ನಿಮಿಷಗಳ ಕಾಲ ನೆನೆಯಲು ಬಿಡಿ (Marinate). ನಂತರ ಇದನ್ನು ಎಣ್ಣೆಯಲ್ಲಿ ಕೆಂಪಾಗುವವರೆಗೆ ಹುರಿಯಿರಿ.

ಮಸಾಲೆ: ಒಂದು ಮಿಕ್ಸಿ ಜಾರ್‌ ನಲ್ಲಿ ಸಣ್ಣ ಈರುಳ್ಳಿ, ಒಣ ಮೆಣಸಿನಕಾಯಿ ಮತ್ತು ಕಾಯಿತುರಿಯನ್ನು ಹಾಕಿ ತರಿತರಿಯಾಗಿ ರುಬ್ಬಿಕೊಳ್ಳಿ.

ಒಗ್ಗರಣೆ: ಮೀನು ಹುರಿದ ಅದೇ ಎಣ್ಣೆಯಲ್ಲಿ ಜಜ್ಜಿದ ಶುಂಠಿ, ಬೆಳ್ಳುಳ್ಳಿ ಮತ್ತು ಹಸಿಮೆಣಸಿನಕಾಯಿಯನ್ನು ಹಾಕಿ ಬಾಡಿಸಿ. ನಂತರ ರುಬ್ಬಿದ ಕಾಯಿತುರಿ ಮಿಶ್ರಣ ಮತ್ತು ಹುಣಸೆಹಣ್ಣಿನ ರಸವನ್ನು ಸೇರಿಸಿ 2 ನಿಮಿಷ ಬೇಯಿಸಿದರೆ ರುಚಿಕರವಾದ ಮೀನಿನ ಫ್ರೈ ಸಿದ್ಧ.

ಬ್ಯಾಚುಲರ್ಸ್‌ ಸ್ಪೆಷಲ್ ಬೂತಾಯಿ ಕರಿ (Sardine Curry for Bachelors):

ಅಡುಗೆ ಮನೆಯಲ್ಲಿ ಅಷ್ಟಾಗಿ ಅನುಭವವಿಲ್ಲದವರಿಗಾಗಿ ಮತ್ತು ಕಡಿಮೆ ಸಮಯದಲ್ಲಿ ರುಚಿಯಾದ ಮೀನಿನ ಸಾರು ಮಾಡಬಯಸುವವರಿಗಾಗಿ ಇದು ಸೂಕ್ತವಾಗಿದೆ.

ವಿಧಾನ: ಶುಚಿಗೊಳಿಸಿದ ಮೀನಿಗೆ ಅರಿಶಿನ, ಖಾರದ ಪುಡಿ, ಕಾಳುಮೆಣಸಿನ ಪುಡಿ ಮತ್ತು ಉಪ್ಪು ಸವರಿ ಸ್ವಲ್ಪ ಹೊತ್ತು ಇಡಿ.

ಮಸಾಲೆ ತಯಾರಿ: ಶುಂಠಿ, ಬೆಳ್ಳುಳ್ಳಿ, ಹಸಿಮೆಣಸಿನಕಾಯಿ ಮತ್ತು ಈರುಳ್ಳಿಯನ್ನು ಸಣ್ಣದಾಗಿ ಹೆಚ್ಚಿಕೊಳ್ಳಿ. ಒಂದು ಪಾತ್ರೆಯಲ್ಲಿ ಎಣ್ಣೆ ಬಿಸಿ ಮಾಡಿ ಸಾಸಿವೆ, ಮೆಂತ್ಯ ಮತ್ತು ಕರಿಬೇವು ಹಾಕಿ ಒಗ್ಗರಣೆ ಕೊಡಿ. ನಂತರ ಹೆಚ್ಚಿದ ಈರುಳ್ಳಿ–ಶುಂಠಿ ಮಿಶ್ರಣವನ್ನು ಹಾಕಿ ಚೆನ್ನಾಗಿ ಬಾಡಿಸಿ.

ಟೊಮೆಟೊ ಪೇಸ್ಟ್: ಟೊಮೆಟೊಗೆ ಅರಿಶಿನ, ಕಾಶ್ಮೀರಿ ಮೊಣಸಿನ ಪುಡಿ ಮತ್ತು ಕೊತ್ತಂಬರಿ ಪುಡಿ ಸೇರಿಸಿ ರುಬ್ಬಿಕೊಳ್ಳಿ. ಇದನ್ನು ಒಗ್ಗರಣೆಗೆ ಸೇರಿಸಿ ಎಣ್ಣೆ ಬಿಡುವವರೆಗೆ ಬೇಯಿಸಿ.

ಅಂತಿಮ ಹಂತ: ಇದಕ್ಕೆ ಸ್ವಲ್ಪ ನೀರು ಮತ್ತು ನೆನೆಸಿದ ಮೀನುಗಳನ್ನು ಹಾಕಿ ಕುದಿಸಿದರೆ, ಬಿಸಿಬಿಸಿ ಅನ್ನ ಅಥವಾ ಕಪ್ಪ (ಬೇಯಿಸಿದ ಮರಗೆಣಸು) ಜೊತೆಗೆ ಸವಿಯಲು ಕೇರಳ ಶೈಲಿಯ ಮೀನಿನ ಸಾರು ರೆಡಿ.

ಜಾಗತಿಕ ಕನ್ನಡಿಗರ ಅಚ್ಚುಮೆಚ್ಚಿನ ಸುದ್ದಿತಾಣ ಮಹಾನಾಯಕ ಸುದ್ದಿಗಳನ್ನು ನಿಮ್ಮ ವಾಟ್ಸಾಪ್ ಗ್ರೂಪ್ ಗಳಿಗೆ ಕಳುಹಿಸಬೇಕೇ? ಹಾಗಿದ್ದರೆ, ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 9686399493 ನಂಬರ್ ಸೇರಿಸಿ.

ಗ್ರೂಪ್ ಗೆ ಜಾಯಿನ್ ಆಗಿ:

https://chat.whatsapp.com/H1duNIQRfXnJcfQKWPzNqD