ಜೈಪುರ: ರಾಜಸ್ಥಾನದ ಪ್ರಸಿದ್ಧ ಪ್ರವಾಸಿ ತಾಣವಾದ ಜೈಪುರದ ಆಂಬರ್ ಕೋಟೆಗೆ ಭೇಟಿ ನೀಡಿದ್ದ ಅಮೆರಿಕದ ಪ್ರವಾಸಿಗನೊಬ್ಬ ಭಾರತೀಯರ ಬಗ್ಗೆ ನೀಡಿದ ಹೇಳಿಕೆ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆ ಮತ್ತು ಆಕ್ರೋಶಕ್ಕೆ ಕಾರಣವಾಗಿದೆ.

ಏನಿದು ಘಟನೆ? ಚಾರ್ಲಿ ಇವಾನ್ಸ್( Charlie Evans ) ಎಂಬ ಅಮೆರಿಕನ್ ಪ್ರವಾಸಿಗ ಆಂಬರ್ ಕೋಟೆಯ ಕಡಿದಾದ ಹಾದಿಯಲ್ಲಿ ನಡೆಯುತ್ತಿರುವಾಗ ವಿಡಿಯೋವೊಂದನ್ನು ರೆಕಾರ್ಡ್ ಮಾಡಿದ್ದಾನೆ. ಈ ವಿಡಿಯೋದಲ್ಲಿ ಆತ, “ಭಾರತೀಯರು ಯಾಕೆ ಅನ್–ಫಿಟ್ (out of shape) ಆಗಿದ್ದಾರೆ ಎಂಬುದು ನನಗೆ ಈಗ ತಿಳಿಯಿತು. ಭಾರತೀಯರು ತುಂಬಾ ಸೋಮಾರಿಗಳು,” ಎಂದು ಹೇಳಿದ್ದಾನೆ.

ವಿಡಿಯೋದಲ್ಲೇನಿದೆ? ಕೋಟೆಯ ಹಾದಿಯನ್ನು ಹತ್ತಲಾಗದೆ ಅರ್ಧ ದಾರಿಯಲ್ಲೇ ಕುಳಿತು ವಿಶ್ರಾಂತಿ ಪಡೆಯುತ್ತಿದ್ದ, ಸಿಗರೇಟು ಸೇದುತ್ತಿದ್ದ ಮತ್ತು ಚಹ–ಕೋಲಾ ಕುಡಿಯುತ್ತಿದ್ದ ಪ್ರವಾಸಿಗರನ್ನು ತೋರಿಸುತ್ತಾ ಚಾರ್ಲಿ ಈ ಟೀಕೆ ಮಾಡಿದ್ದಾನೆ. “ಸಾವಿರಾರು ಜನರು ಕೆಳಗಿದ್ದಾರೆ, ಆದರೆ ಬೆಟ್ಟದ ಮೇಲಕ್ಕೆ ಬರುತ್ತಿರುವವರು ಕೆಲವೇ ಮಂದಿ. ಇವರೆಲ್ಲರೂ ಪ್ರವೇಶ ಶುಲ್ಕ ಪಾವತಿಸಿ ಬರುತ್ತಾರೆ, ಆದರೆ ಅರ್ಧ ದಾರಿಯಲ್ಲೇ ಸುಸ್ತಾಗಿ ಕುಳಿತುಕೊಳ್ಳುತ್ತಾರೆ. ಇವರಿಗೆ ಸ್ವಲ್ಪ ದೂರ ನಡೆಯುವ ತಾಳ್ಮೆಯೂ ಇಲ್ಲ, ಶಕ್ತಿಯೂ ಇಲ್ಲ” ಎಂದು ಆತ ಲೇವಡಿ ಮಾಡಿದ್ದಾನೆ.

ವಿರೋಧ: “ಭಾರತೀಯರು ಪ್ರವಾಸಕ್ಕೆ ಬರುವುದು ಎಂಜಾಯ್ ಮಾಡಲು, ಕೇವಲ ಗುರಿ ತಲುಪಲು ಅಲ್ಲ. ದಾರಿಯಲ್ಲಿ ಕುಳಿತು ಹರಟೆ ಹೊಡೆಯುವುದು ನಮ್ಮ ಸಂಸ್ಕೃತಿಯ ಒಂದು ಭಾಗ” ಎಂದು ಹಲವರು ಆತನಿಗೆ ತಿರುಗೇಟು ನೀಡಿದ್ದಾರೆ. ಇನ್ನು ಕೆಲವರು, “ನೀವು ಕೇವಲ ಶೇ. 2ರಷ್ಟು ಜನರನ್ನು ನೋಡಿ ಇಡೀ ಭಾರತೀಯರ ಬಗ್ಗೆ ನಿರ್ಧಾರಕ್ಕೆ ಬರಬೇಡಿ,” ಎಂದು ಕಿಡಿಕಾರಿದ್ದಾರೆ.

ಕೆಲವು ಭಾರತೀಯರೇ ಈತನ ಮಾತನ್ನು ಒಪ್ಪಿಕೊಂಡಿದ್ದಾರೆ. “ನಮ್ಮಲ್ಲಿ ಫಿಟ್‌ ನೆಸ್ ಬಗ್ಗೆ ಅರಿವು ಕಡಿಮೆ ಇರುವುದು ನಿಜ. ದೇವಸ್ಥಾನ ಬೆಟ್ಟದ ಮೇಲಿದ್ದರೆ ಮಾತ್ರ ನಾವು ಕಷ್ಟಪಟ್ಟು ಹತ್ತುತ್ತೇವೆ, ಇಲ್ಲದಿದ್ದರೆ ಸೋಮಾರಿತನ ಪ್ರದರ್ಶಿಸುತ್ತೇವೆ,” ಎಂದು ಕೆಲವರು ಕಮೆಂಟ್ ಮಾಡಿದ್ದಾರೆ.

ಒಟ್ಟಾರೆಯಾಗಿ, ಈ ಅಮೆರಿಕನ್ ಪ್ರವಾಸಿಗನ ಹೇಳಿಕೆ ಭಾರತೀಯರ ಜೀವನಶೈಲಿ ಮತ್ತು ಆರೋಗ್ಯದ ಬಗ್ಗೆ ಇಂಟರ್ನೆಟ್‌ನಲ್ಲಿ ದೊಡ್ಡ ಮಟ್ಟದ ಚರ್ಚೆಯನ್ನು ಹುಟ್ಟುಹಾಕಿದೆ.

ಜಾಗತಿಕ ಕನ್ನಡಿಗರ ಅಚ್ಚುಮೆಚ್ಚಿನ ಸುದ್ದಿತಾಣ ಮಹಾನಾಯಕ ಸುದ್ದಿಗಳನ್ನು ನಿಮ್ಮ ವಾಟ್ಸಾಪ್ ಗ್ರೂಪ್ ಗಳಿಗೆ ಕಳುಹಿಸಬೇಕೇ? ಹಾಗಿದ್ದರೆ, ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 9686399493 ನಂಬರ್ ಸೇರಿಸಿ.

ಗ್ರೂಪ್ ಗೆ ಜಾಯಿನ್ ಆಗಿ:

https://chat.whatsapp.com/H1duNIQRfXnJcfQKWPzNqD