ಚಿಕ್ಕಮಗಳೂರು: ಕಾಫಿನಾಡು ಚಿಕ್ಕಮಗಳೂರು ಜಿಲ್ಲೆಯ ಮಲೆನಾಡು ಭಾಗದಲ್ಲಿ ಹದಗೆಟ್ಟ ರಸ್ತೆಗಳ ದುರಸ್ಥಿಗೆ ಆಗ್ರಹಿಸಿ ಸ್ಥಳೀಯ ಯುವಸಮೂಹ ಜನಪ್ರತಿನಿಧಿಗಳು ಹಾಗೂ ಆಡಳಿತ ವ್ಯವಸ್ಥೆಯ ವಿರುದ್ಧ ವಿಭಿನ್ನ ಶೈಲಿಯಲ್ಲಿ ಸಮರ ಸಾರಿದೆ. ಜಿಲ್ಲೆಯಾದ್ಯಂತ ಸಾಲು ಸಾಲು ಗುಂಡಿ ಬಿದ್ದ ರಸ್ತೆಗಳ ವಾಸ್ತವ ಸ್ಥಿತಿಯನ್ನು ಎತ್ತಿಹಿಡಿಯುವ ಯುವಕರ ಸೃಜನಶೀಲ ಹಾಗೂ ವ್ಯಂಗ್ಯಪೂರ್ಣ ರೀಲ್ಸ್ ಹಾಗೂ ವೀಡಿಯೋಗಳು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್ ಟ್ರೆಂಡಿಂಗ್ ಆಗುತ್ತಿವೆ.

ರಸ್ತೆಯಲ್ಲಿ ‘ಕೆರೆ-ದಡ’ ಆಟ! ಶೃಂಗೇರಿಯಲ್ಲಿ ಶಾಸಕರಿಗೆ ಪಂಚ್:

ಶೃಂಗೇರಿ ತಾಲೂಕಿನಾದ್ಯಂತ ಹಾಗೂ ಶೃಂಗೇರಿ–ಚಿಕ್ಕಮಗಳೂರು ಹೆದ್ದಾರಿಯಲ್ಲಿ ರಸ್ತೆಗಳು ಸಣ್ಣ ಪ್ರಮಾಣದ ಕೆರೆಗಳಂತಾಗಿ ಬದಲಾಗಿವೆ. ಈ ಆಡಳಿತಾತ್ಮಕ ನಿರ್ಲಕ್ಷ್ಯಕ್ಕೆ ಚಾಟಿ ಬೀಸಿದ ಯುವಕರ ತಂಡವೊಂದು, ಮಳೆಯಿಂದ ನೀರು ತುಂಬಿದ ರಸ್ತೆಯ ಗುಂಡಿಗಳನ್ನು ‘ಕೆರೆ’ ಎಂದು ಬಿಂಬಿಸಿ ‘ಕೆರೆ-ದಡ’ ಆಟವಾಡುವ ವೀಡಿಯೋ ಮಾಡಿ ಹಂಚಿಕೊಂಡಿದೆ. “ಇದು ರಸ್ತೆಯೋ ಅಥವಾ ಕೆರೆಯೋ?” ಎಂದು ಅಣಕಿಸುವ ಈ ವೀಡಿಯೋ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಸ್ಥಳೀಯ ಶಾಸಕರು ಹಾಗೂ ಅಧಿಕಾರಿಗಳಿಗೆ ನೇರವಾಗಿಯೇ ಬಿಸಿ ಮುಟ್ಟಿಸಿದೆ.

ಮೂಡಿಗೆರೆಯಲ್ಲಿ ಅಣಕು ಶವಯಾತ್ರೆ:

ಇತ್ತ ಮೂಡಿಗೆರೆ ಪಟ್ಟಣದಲ್ಲೂ ಯುವಕರು ವಿಭಿನ್ನ ರೀತಿಯ ಹೋರಾಟಕ್ಕೆ ಇಳಿದಿದ್ದಾರೆ. ‘ಸ್ಮಶಾನದ ಗುಂಡಿ’ಯಂತಾಗಿರುವ ರಸ್ತೆಗಳಿಂದಾಗಿ ಸಂಭವಿಸುವ ಸಾವು-ನೋವುಗಳನ್ನು ಬಿಂಬಿಸಲು ಯುವಕರು ಅಣಕು ಶವಯಾತ್ರೆ ನಡೆಸಿ ವೀಡಿಯೋ ಮಾಡಿದ್ದಾರೆ. ರಸ್ತೆ ಗುಂಡಿಗಳಿಂದ ಪ್ರಾಣಾಪಾಯ ಎದುರಾಗುತ್ತಿರುವುದನ್ನು ಕಣ್ಣಿಗೆ ಕಟ್ಟುವಂತೆ ಚಿತ್ರೀಕರಿಸಿದ ಈ ರೀಲ್ಸ್, ಆಡಳಿತದ ಕಣ್ಣು ತೆರೆಸುವ ಪ್ರಯತ್ನವಾಗಿದೆ.

ಮಲೆನಾಡಿನಾದ್ಯಂತ ಸಂಚಾರ ವ್ಯವಸ್ಥೆ ಸಂಪೂರ್ಣವಾಗಿ ಹಳಿ ತಪ್ಪಿದ್ದು, ಕೆಳಗಿನ ಪ್ರಮುಖ ರಸ್ತೆಗಳು ತೀವ್ರವಾಗಿ ಹಾಳಾಗಿವೆ:

ಶೃಂಗೇರಿ – ಚಿಕ್ಕಮಗಳೂರು ಹೆದ್ದಾರಿ

ಎನ್.ಆರ್. ಪುರ – ಕೊಪ್ಪ – ಶೃಂಗೇರಿ ರಸ್ತೆ

ಬಾಳೆಹೊನ್ನೂರು – ಎನ್.ಆರ್. ಪುರ ರಾಜ್ಯ ಹೆದ್ದಾರಿ

ದಿನನಿತ್ಯ ಈ ಮಾರ್ಗಗಳಲ್ಲಿ ಸಂಚರಿಸುವ ಸಾರ್ವಜನಿಕರು, ಶಾಲಾ ಮಕ್ಕಳು ಹಾಗೂ ಪ್ರವಾಸಿಗರು ತೀವ್ರ ಸಂಕಷ್ಟ ಎದುರಿಸುತ್ತಿದ್ದಾರೆ. ಸತತ ಮನವಿಗಳ ನಂತರವೂ ರಸ್ತೆ ದುರಸ್ತಿಗೆ ಕ್ರಮ ಕೈಗೊಳ್ಳದ ಜನಪ್ರತಿನಿಧಿಗಳ ವಿರುದ್ಧ ಯುವಜನತೆ ಕಟು ಶಬ್ದಗಳಲ್ಲಿ ಆಕ್ರೋಶ ವ್ಯಕ್ತಪಡಿಸುತ್ತಿದ್ದು, ತಕ್ಷಣವೇ ಗುಂಡಿ ಮುಚ್ಚಿ ಸುಗಮ ಸಂಚಾರಕ್ಕೆ ಅನುವು ಮಾಡಿಕೊಡಬೇಕೆಂದು ಒತ್ತಾಯಿಸಿದ್ದಾರೆ.

ಜಾಗತಿಕ ಕನ್ನಡಿಗರ ಅಚ್ಚುಮೆಚ್ಚಿನ ಸುದ್ದಿತಾಣ ಮಹಾನಾಯಕ ಸುದ್ದಿಗಳನ್ನು ನಿಮ್ಮ ವಾಟ್ಸಾಪ್ ಗ್ರೂಪ್ ಗಳಿಗೆ ಕಳುಹಿಸಬೇಕೇ? ಹಾಗಿದ್ದರೆ, ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 9686399493 ನಂಬರ್ ಸೇರಿಸಿ.

ಗ್ರೂಪ್ ಗೆ ಜಾಯಿನ್ ಆಗಿ: https://chat.whatsapp.com/H1duNIQRfXnJcfQKWPzNqD