ನವದೆಹಲಿ: ನೆಲದ ಮೇಲಿನ ಮೊಬೈಲ್ ನೆಟ್‌ವರ್ಕ್ ಮತ್ತು ಫೈಬರ್ ಮಿತಿಗಳನ್ನು ಮೀರಿ, ರಿಲಯನ್ಸ್ ಜಿಯೋ ಸಂಸ್ಥೆಯು ಬಾಹ್ಯಾಕಾಶದ ಮೂಲಕ ಸಂಪರ್ಕ ಕಲ್ಪಿಸುವ ಮಹತ್ವಾಕಾಂಕ್ಷೆಯ ‘ಸಾವರಿನ್ ಸ್ಯಾಟಲೈಟ್ ಕನೆಕ್ಟಿವಿಟಿ’ ಯೋಜನೆಯನ್ನು ದೆಹಲಿಯಲ್ಲಿ ನಡೆಯುತ್ತಿರುವ ಇಂಡಿಯಾ ಮೊಬೈಲ್ ಕಾಂಗ್ರೆಸ್ (IMC 2026) ನಲ್ಲಿ ಪ್ರದರ್ಶಿಸಿದೆ.

ಈ ಯೋಜನೆಯಡಿ ಸುಮಾರು 1,600 ಲೋ ಅರ್ಥ್ ಆರ್ಬಿಟ್ (LEO) ಉಪಗ್ರಹಗಳ ಕಾನ್ಸ್ಟೆಲೇಶನ್ ಹಾಗೂ ಭಾರತದಲ್ಲೇ 23 ಗ್ರೌಂಡ್ ಸ್ಟೇಷನ್‌ಗಳನ್ನು ಸ್ಥಾಪಿಸಲು ಜಿಯೋ ಸಿದ್ಧತೆ ನಡೆಸಿದೆ. ಸಾಮಾನ್ಯ ಟವರ್ ಅಥವಾ ಫೈಬರ್ ನೆಟ್‌ವರ್ಕ್ ತಲುಪಲು ಅಸಾಧ್ಯವಿರುವ ದೂರದ ಹಳ್ಳಿಗಳು, ದ್ವೀಪಗಳು, ಗಡಿ ಔಟ್‌ಪೋಸ್ಟ್‌ಗಳು ಹಾಗೂ ಸಮುದ್ರ ಭಾಗಗಳಿಗೂ 100% ಕವರೇಜ್ ಒದಗಿಸುವುದು ಇದರ ಮುಖ್ಯ ಗುರಿಯಾಗಿದೆ.

ಉಪಗ್ರಹಗಳ ವಿನ್ಯಾಸ, ಎಂಜಿನಿಯರಿಂಗ್‌ನಿಂದ ಹಿಡಿದು ಉಡಾವಣೆ ಮತ್ತು ಕಾರ್ಯಾಚರಣೆಯವರೆಗಿನ ಇಡೀ ಪ್ರಕ್ರಿಯೆಯ ಮೇಲೆ ಸಂಪೂರ್ಣ ದೇಶೀಯ ನಿಯಂತ್ರಣವಿರಿಸಿಕೊಳ್ಳುವುದು ಕಂಪನಿಯ ದೃಷ್ಟಿಕೋನವಾಗಿದೆ. ಇದರೊಂದಿಗೆ ಗ್ರಾಮೀಣ ಭಾಗದಲ್ಲಿ ‘ಡೈರೆಕ್ಟ್ ಟು ಡಿವೈಸ್’ ಕಾಲಿಂಗ್ ಸೌಲಭ್ಯ, ರಕ್ಷಣೆ, ವಿಪತ್ತು ನಿರ್ವಹಣೆ, ವಾಯುಯಾನ ಹಾಗೂ ಸಮುದ್ರಯಾನ ಕ್ಷೇತ್ರಗಳಲ್ಲೂ ಈ ತಂತ್ರಜ್ಞಾನ ಕ್ರಾಂತಿ ಸೃಷ್ಟಿಸುವ ನಿರೀಕ್ಷೆಯಿದೆ.