ಕೇಂದ್ರಪಾರ(ಒಡಿಶಾ): ಚಲಿಸುತ್ತಿದ್ದ ಬಸ್ ನಲ್ಲಿ ಹೃದಯಾಘಾತದಿಂದ ಮೃತಪಟ್ಟ ವ್ಯಕ್ತಿಯ ಮೃತದೇಹವನ್ನು ಬಸ್ ಸಿಬ್ಬಂದಿ ದಾರಿ ಮಧ್ಯೆಯೇ ಇಳಿಸಿ ಹೋದ ಅಮಾನವೀಯ ಘಟನೆ ನಡೆದಿದ್ದು, ಮೃತಪಟ್ಟ ವ್ಯಕ್ತಿಯ ಪತ್ನಿ ರಸ್ತೆ ಬದಿಯಲ್ಲಿ ತನ್ನ ಪತಿಯ ಮೃತದೇಹದ ಮುಂದೆ ಅಸಹಾಯಕಳಾಗಿ ಕುಳಿತ ದೃಶ್ಯ ಹೃದಯ ವಿದ್ರಾವಕವಾಗಿತ್ತು.

ದುಲಾರಿ ಮರ್ಧಿ. ಕೇಂದ್ರಪಾರ ಜಿಲ್ಲೆಯ ಚಾಂಡಿಖೋಲ್-ಪರಾದ್ವೀಪ್ ರಾಷ್ಟ್ರೀಯ ಹೆದ್ದಾರಿ 53ರ ಬಳಿ ಗುರುವಾರ ಈ ಘಟನೆ ನಡೆದಿದೆ. ಬಾಘ್ರೈ ಮರ್ಧಿ ಎಂಬವರು ತನ್ನ ಪತ್ನಿ ದುಲಾರಿ ಮರ್ಧಿ ಜೊತೆಗೆ ಬಸ್ ನಲ್ಲಿ ಪ್ರಯಾಣಿಸುತ್ತಿದ್ದ ವೇಳೆ ಬಸ್ ನಲ್ಲೇ ಹೃದಯಾಘಾತದಿಂದ ಮೃತಪಟ್ಟಿದ್ದಾರೆ. ಈ ವೇಳೆ ಬಸ್ ಸಿಬ್ಬಂದಿಯು ಮಹಿಳೆಗೆ ಯಾವುದೇ ಸಹಾಯವನ್ನೂ ಮಾಡದೇ ನಡು ದಾರಿಯಲ್ಲಿ ಮೃತದೇಹ ಮತ್ತು ಮಹಿಳೆಯನ್ನು ಇಳಿಸಿ ಮುಂದೆ ಸಾಗಿದ್ದಾರೆ. ಪತಿಯ ದೇಹವನ್ನು ಹೇಗೆ ಸಾಗಿಸಬೇಕು ಎನ್ನುವುದು ತಿಳಿಯದೇ, ಮಹಿಳೆ ಅಳುತ್ತಾ ಕುಳಿತ ದೃಶ್ಯ ಕಂಡು ಬಂತು.

ಮಹಿಳೆ ಸಹಾಯಕ್ಕಾಗಿ ಬೇಡಿಕೊಳ್ಳುತ್ತಿದ್ದರೂ ಯಾರೊಬ್ಬರೂ ಸಹಾಯ ಮಾಡದೇ ಆಕೆಯನ್ನು ನಿರ್ಲಕ್ಷಿಸಿ ಮುಂದೆ ಸಾಗುತ್ತಿದ್ದರು. ಕೊನೆಗೆ ಸನಾತನ್ ಮುದುಲಿ ಎಂಬ ವ್ಯಕ್ತಿಯೊಬ್ಬ ಮನಕರಗಿ, ಮೃತದೇಹವನ್ನು ಸಾಗಿಸಲು ಸಹಾಯ ಮಾಡಿದರು.

ಬಸ್ಸಿನಲ್ಲಿ ಪ್ರಯಾಣಿಸುತ್ತಿದ್ದಾಗ ಹೃದಯಾಘಾತದಿಂದ ಯಾರೋ ಸಾವನ್ನಪ್ಪಿದ್ದಾರೆ ಎಂಬ ಸುದ್ದಿ ತಿಳಿಯಿತು. ಬಸ್ ಸಿಬ್ಬಂದಿ ಬಲವಂತವಾಗಿ ಅವರನ್ನು ರಸ್ತೆ ಮಧ್ಯೆದಲ್ಲಿಯೇ ಇಳಿಸಿದರೆಂಬ ಮಾಹಿತಿಯೂ ಸಿಕ್ಕಿತು. ತಕ್ಷಣ ಇಲ್ಲಿಗೆ ಬಂದು ನೋಡಿದಾಗ ಮೃತ ವ್ಯಕ್ತಿಯನ್ನು ರಸ್ತೆಬದಿಯಲ್ಲಿ ಮಲಗಿಸಲಾಗಿತ್ತು. ಪತಿಯ ಮೃತದೇಹ ಕಾಯುತ್ತಾ ಪತ್ನಿ ಅಳುತ್ತಿದ್ದರು. ನಾವು ಭಾನುವಾರ ಕೆಲಸ ಮಾಡಲು ಕೇಂದ್ರಪಾರಕ್ಕೆ ಬಂದಿದ್ದೆವು. ಮನೆಗೆ ಹಿಂದಿರುಗಿದಾಗ ಹೀಗೆ ಆಯಿತು. ನಾವು ಮನೆಗೆ ಹೋಗಬೇಕು. ಮನೆಯಲ್ಲಿ ಒಬ್ಬ ಮಗ ಮತ್ತು ಪುಟ್ಟ ಮಗಳಿದ್ದಾರೆ ಎಂದು ನನ್ನ ಬಳಿ ಆ ಮಹಿಳೆ ಹೇಳಿಕೊಂಡರು. ಅವರ ಮನೆ ಇರುವುದು ಚಂದಬಿಲ್ ಎಂಬಲ್ಲಿ ಎಂದು ಗೊತ್ತಾಯಿತು. ತಕ್ಷಣ ನಾವು ಐಐಸಿಗೆ ಕರೆ ಮಾಡಿದೆವು. ಆದರೆ, ಅವರು ಯಾವುದೇ ಕ್ರಮ ಕೈಗೊಳ್ಳದ ಕಾರಣ, ಖಾಸಗಿ ಆಂಬ್ಯುಲೆನ್ಸ್‌ಗೆ ಕರೆ ಮಾಡಿ ಶವವನ್ನು ಕೇಂದ್ರಪಾರ ಜಿಲ್ಲಾ ಮುಖ್ಯ ಆಸ್ಪತ್ರೆಗೆ ಕಳುಹಿಸಿದೆವು ಎಂದು ಸನಾತನ್ ಮುದುಲಿ ಮಾಧ್ಯಮಗಳಿಗೆ ಪ್ರತಿಕ್ರಿಯೆ ನೀಡಿದ್ದಾರೆ.

ಜಾಗತಿಕ ಕನ್ನಡಿಗರ ಅಚ್ಚುಮೆಚ್ಚಿನ ಸುದ್ದಿತಾಣ ಮಹಾನಾಯಕ ಸುದ್ದಿಗಳನ್ನು ನಿಮ್ಮ ವಾಟ್ಸಾಪ್ ಗ್ರೂಪ್ ಗಳಿಗೆ ಕಳುಹಿಸಬೇಕೇ? ಹಾಗಿದ್ದರೆ, ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 9686399493 ನಂಬರ್ ಸೇರಿಸಿ.

ಗ್ರೂಪ್ ಗೆ ಜಾಯಿನ್ ಆಗಿ:

https://chat.whatsapp.com/H1duNIQRfXnJcfQKWPzNqD