ಕೃತಕ ಬುದ್ಧಿಮತ್ತೆ (AI) ನಮ್ಮ ಕೆಲಸಗಳನ್ನು ಸುಲಭಗೊಳಿಸುತ್ತದೆ ಎಂಬ ನಂಬಿಕೆಗೆ ದೊಡ್ಡ ಹೊಡೆತ ಬಿದ್ದಿದೆ. ಅಮೆರಿಕದ ಸ್ಯಾನ್ ಫ್ರಾನ್ಸಿಸ್ಕೋ ಮೂಲದ ಖ್ಯಾತ ಹೂಡಿಕೆದಾರ (Venture Capitalist) ನಿಕ್ ಡೇವಿಡೋವ್ ಅವರು ಎಐ ಏಜೆಂಟ್ ಬಳಸಲು ಹೋಗಿ ತಮ್ಮ 15 ವರ್ಷಗಳ ಅಮೂಲ್ಯ ಕೌಟುಂಬಿಕ ಫೋಟೋಗಳನ್ನು ಕಳೆದುಕೊಂಡ ಘಟನೆ ವರದಿಯಾಗಿದೆ.

ಏನಿದು ಘಟನೆ? ನಿಕ್ ಡೇವಿಡೋವ್ ಅವರು ತಮ್ಮ ಪತ್ನಿಯ ಕಂಪ್ಯೂಟರ್‌ ನಲ್ಲಿದ್ದ ಫೈಲ್‌ ಗಳನ್ನು ವ್ಯವಸ್ಥಿತವಾಗಿ ಜೋಡಿಸಲು ‘ಆಂಥ್ರೋಪಿಕ್’ (Anthropic) ಕಂಪನಿಯ ‘ಕ್ಲೋಡ್ ಕೋವರ್ಕ್’ (Claude Cowork) ಎಂಬ ಎಐ ಏಜೆಂಟ್ ಸಹಾಯ ಪಡೆದಿದ್ದರು. ಕೆಲಸದ ಮಧ್ಯೆ ಈ ಎಐ ಏಜೆಂಟ್, ಕೆಲವು ತಾತ್ಕಾಲಿಕ ಮೈಕ್ರೋಸಾಫ್ಟ್ ಆಫೀಸ್ ಫೈಲ್‌ಗಳನ್ನು (Temp files) ಅಳಿಸಲು ಅನುಮತಿ ಕೇಳಿತು. ನಿಕ್ ಅವರು ಕೂಡ ಅದಕ್ಕೆ ಸಮ್ಮತಿ ನೀಡಿದರು.

ಆದರೆ, ಕೇವಲ ತಾತ್ಕಾಲಿಕ ಫೈಲ್‌ ಗಳನ್ನು ಅಳಿಸುವ ಬದಲು, ಆ ಎಐ ಏಜೆಂಟ್ 15 ವರ್ಷಗಳ ಕಾಲ ಸಂಗ್ರಹಿಸಿಟ್ಟಿದ್ದ ಫೋಟೋಗಳ ಫೋಲ್ಡರ್ ಅನ್ನೇ ಅಳಿಸಿಹಾಕಿತು. ಇದರಲ್ಲಿ ಮಕ್ಕಳ ಬಾಲ್ಯದ ಫೋಟೋಗಳು, ಮದುವೆ ಹಾಗೂ ಪ್ರವಾಸದ ಚಿತ್ರಗಳು ಸೇರಿದಂತೆ ಮರುಸೃಷ್ಟಿಸಲು ಸಾಧ್ಯವಿಲ್ಲದ ಸಾವಿರಾರು ನೆನಪುಗಳಿದ್ದವು.

ಚೇತರಿಕೆ ಕಷ್ಟವಾಯಿತು: ಫೋಟೋಗಳು ‘ಟ್ರ್ಯಾಶ್’ (Trash) ಫೋಲ್ಡರ್‌ನಲ್ಲಿಯೂ ಇರಲಿಲ್ಲ ಮತ್ತು ಐಕ್ಲೌಡ್ (iCloud) ನಲ್ಲಿಯೂ ಹೊಸ ಬದಲಾವಣೆಗಳು ಅಪ್‌ಡೇಟ್ ಆಗಿದ್ದರಿಂದ ಅವುಗಳನ್ನು ಮರಳಿ ಪಡೆಯುವುದು ಕಷ್ಟವಾಯಿತು. “ನನಗೆ ಹೃದಯಾಘಾತವಾದಷ್ಟು ಆಘಾತವಾಯಿತು” ಎಂದು ನಿಕ್ ತಮ್ಮ ಅಳಲನ್ನು ಸಾಮಾಜಿಕ ಜಾಲತಾಣ ಎಕ್ಸ್ (X) ನಲ್ಲಿ ಹಂಚಿಕೊಂಡಿದ್ದಾರೆ.

ಕೊನೆಗೆ ಆಪಲ್ (Apple) ಸಂಸ್ಥೆಯ ಸಹಾಯ ಪಡೆದು, ಐಕ್ಲೌಡ್‌ ನಲ್ಲಿದ್ದ ಹಳೆಯ ಬ್ಯಾಕಪ್ ಮೂಲಕ ಫೋಟೋಗಳನ್ನು ಮರುಪಡೆಯಲು ಅವರು ಪ್ರಯತ್ನಿಸುತ್ತಿದ್ದಾರೆ.

ಜಾಗತಿಕ ಕನ್ನಡಿಗರ ಅಚ್ಚುಮೆಚ್ಚಿನ ಸುದ್ದಿತಾಣ ಮಹಾನಾಯಕ ಸುದ್ದಿಗಳನ್ನು ನಿಮ್ಮ ವಾಟ್ಸಾಪ್ ಗ್ರೂಪ್ ಗಳಿಗೆ ಕಳುಹಿಸಬೇಕೇ? ಹಾಗಿದ್ದರೆ, ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 9686399493 ನಂಬರ್ ಸೇರಿಸಿ.

ಗ್ರೂಪ್ ಗೆ ಜಾಯಿನ್ ಆಗಿ:

https://chat.whatsapp.com/H1duNIQRfXnJcfQKWPzNqD