ಪ್ರಕೃತಿ ಪ್ರೇರಿತ ವಿನ್ಯಾಸಕ್ಕೆ ಹೆಸರುವಾಸಿಯಾದ ಸಿಂಗಾಪುರದ ಚಾಂಗಿ ಅಂತರ್ ರಾಷ್ಟ್ರೀಯ ವಿಮಾನ ನಿಲ್ದಾಣವು ಪ್ರಯಾಣಿಕರಿಗಾಗಿ ವಿಶ್ವದ ಮೊದಲ ಡಿಜಿಟಲ್ ಉಪಕ್ರಮವನ್ನು ಪರಿಚಯಿಸುತ್ತಿದೆ. ಸ್ವಯಂಚಾಲಿತ ವಲಸೆ ಅನುಮತಿಯೊಂದಿಗೆ ಚಾಂಗಿ ವಿಮಾನ ನಿಲ್ದಾಣವು 2024 ರಿಂದ ಪಾಸ್ ಪೋರ್ಟ್ ಮುಕ್ತವಾಗಲಿದೆ ಎಂದು ಸಿಎನ್ಎನ್ ಉಲ್ಲೇಖಿಸಿ ಎಎನ್ಐ ವರದಿ ಮಾಡಿದೆ.

Provided by

ಸಿಂಗಾಪುರದ ಸಚಿವ ಜೋಸೆಫಿನ್ ಟಿಯೊ ಅವರು ಸಂಸತ್ತಿನ ಅಧಿವೇಶನದಲ್ಲಿ ಈ ಘೋಷಣೆ ಮಾಡಿದ್ದಾರೆ. ಈ ಸಂದರ್ಭದಲ್ಲಿ ದೇಶದ ವಲಸೆ ಕಾಯ್ದೆಗೆ ಹಲವಾರು ಬದಲಾವಣೆಗಳನ್ನು ಅಂಗೀಕರಿಸಲಾಯಿತು. “ಸ್ವಯಂಚಾಲಿತ, ಪಾಸ್ ಪೋರ್ಟ್ ಮುಕ್ತ ವಲಸೆ ಕ್ಲಿಯರೆನ್ಸ್ ಅನ್ನು ಪರಿಚಯಿಸಿದ ವಿಶ್ವದ ಮೊದಲ ಕೆಲವು ದೇಶಗಳಲ್ಲಿ ಸಿಂಗಾಪುರವೂ ಒಂದಾಗಿದೆ” ಎಂದು ಅವರು ಹೇಳಿದರು.

ವಿಶ್ವದ ಅತ್ಯಂತ ಸುಂದರವಾದ ವಿಮಾನ ನಿಲ್ದಾಣವು ಮುಖ ಗುರುತಿಸುವಿಕೆ ಸಾಫ್ಟ್ ವೇರ್ ಜೊತೆಗೆ ಬಯೋಮೆಟ್ರಿಕ್ಸ್ ಬಳಸಿ ಸ್ವಯಂಚಾಲಿತ ವಲಸೆ ಕ್ಲಿಯರೆನ್ಸ್ ಅನ್ನು ಪರಿಚಯಿಸಲಿದ್ದು, ಪ್ರಯಾಣಿಕರಿಗೆ ಪಾಸ್ ಪೋರ್ಟ್ ಇಲ್ಲದೆ ನಗರ-ರಾಜ್ಯವನ್ನು ತೊರೆಯಲು ಅನುವು ಮಾಡಿಕೊಡುತ್ತದೆ. ಮುಖ ಗುರುತಿಸುವಿಕೆ ಸಾಫ್ಟ್ ವೇರ್ ಈಗಾಗಲೇ ಚಾಂಗಿ ವಿಮಾನ ನಿಲ್ದಾಣದಲ್ಲಿ ವಲಸೆ ಚೆಕ್ ಪಾಯಿಂಟ್ ಗಳಲ್ಲಿ ಸ್ವಯಂಚಾಲಿತ ಲೇನ್‌ಗಳಲ್ಲಿ ಸ್ವಲ್ಪ ಮಟ್ಟಿಗೆ ಬಳಕೆಯಲ್ಲಿದ್ದರೂ, ಮುಂಬರುವ ಬದಲಾವಣೆಗಳು ಹೆಚ್ಚು ವಿಸ್ತಾರವಾಗಿರುತ್ತವೆ.

ಮುಂಬರುವ ಬದಲಾವಣೆಗಳಲ್ಲು “ಪ್ರಯಾಣಿಕರು ತಮ್ಮ ಪ್ರಯಾಣದ ದಾಖಲೆಗಳನ್ನು ಟಚ್ ಪಾಯಿಂಟ್ ಗಳಲ್ಲಿ ಪದೇ ಪದೇ ಪ್ರಸ್ತುತಪಡಿಸುವ ಅಗತ್ಯವನ್ನು ಕಡಿಮೆ ಮಾಡುತ್ತದೆ. ಅಲ್ಲದೇ ಹೆಚ್ಚು ತಡೆರಹಿತ ಮತ್ತು ಅನುಕೂಲಕರ ಪ್ರಕ್ರಿಯೆಗೆ ಅನುವು ಮಾಡಿಕೊಡುತ್ತದೆ” ಎಂದು ಟಿಯೊ ಹೇಳಿದರು. ಆದಾಗ್ಯೂ, ಪಾಸ್ ಪೋರ್ಟ್ ಮುಕ್ತ ಕ್ಲಿಯರೆನ್ಸ್ ನೀಡದ ಸಿಂಗಾಪುರದ ಹೊರಗಿನ ಅನೇಕ ದೇಶಗಳಿಗೆ ಪಾಸ್ ಪೋರ್ಟ್ ಗಳು ಬೇಕಾಗುತ್ತವೆ ಎಂದು ಟಿಯೊ ಒತ್ತಿ ಹೇಳಿದ್ದಾರೆ.

ಬ್ಯಾಗ್ ಡ್ರಾಪ್ ಗಳಿಂದ ವಲಸೆ ಕ್ಲಿಯರೆನ್ಸ್ ಮತ್ತು ಬೋರ್ಡಿಂಗ್ ವರೆಗೆ ವಿವಿಧ ಸ್ವಯಂಚಾಲಿತ ಟಚ್ ಪಾಯಿಂಟ್ ಗಳಲ್ಲಿ ಬಳಸಲಾಗುವ “ದೃಢೀಕರಣದ ಒಂದೇ ಟೋಕನ್” ಅನ್ನು ರಚಿಸಲು ಬಯೋಮೆಟ್ರಿಕ್ಸ್ ಅನ್ನು ಬಳಸಲಾಗುತ್ತದೆ. ಬೋರ್ಡಿಂಗ್ ಪಾಸ್ ಗಳು ಮತ್ತು ಪಾಸ್ ಪೋರ್ಟ್ ಗಳಂತಹ ಭೌತಿಕ ಪ್ರಯಾಣ ದಾಖಲೆಗಳ ಅಗತ್ಯವನ್ನು ತೆಗೆದುಹಾಕುತ್ತದೆ ಎನ್ನಲಾಗಿದೆ.