ಶಿವಪುರಿ, ಮಧ್ಯಪ್ರದೇಶ: ಮಧ್ಯಪ್ರದೇಶದ ಶಿವಪುರಿಯಲ್ಲಿ ನಡೆದ ಸಾರ್ವಜನಿಕ ಕಾರ್ಯಕ್ರಮವೊಂದರಲ್ಲಿ 73 ವರ್ಷದ ಹಿರಿಯ ಬಿಜೆಪಿ ಶಾಸಕ ದೇವೇಂದ್ರ ಕುಮಾರ್ ಜೈನ್ ಅವರು ಕೇಂದ್ರ ಸಚಿವ ಜ್ಯೋತಿರಾದಿತ್ಯ ಸಿಂಧಿಯಾ ಅವರ 31 ವರ್ಷದ ಪುತ್ರ ಮಹಾರ್ಯಮನ್ ಸಿಂಧಿಯಾ ಅವರ ಪಾದ ಮುಟ್ಟಿ ನಮಸ್ಕರಿಸಿದ್ದು, ಈಗ ರಾಜಕೀಯ ವಲಯದಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.

ಏನಿದು ಘಟನೆ? ಶಿವಪುರಿ ಜಿಲ್ಲಾ ಕ್ರೀಡಾಂಗಣದಲ್ಲಿ ನಡೆದ 69ನೇ ರಾಷ್ಟ್ರೀಯ ಶಾಲಾ ಕ್ರೀಡಾಕೂಟದ ಸಂದರ್ಭದಲ್ಲಿ ಈ ಘಟನೆ ನಡೆದಿದೆ. ಅಂದು ಶಾಸಕ ದೇವೇಂದ್ರ ಜೈನ್ ಅವರ ಹುಟ್ಟುಹಬ್ಬವೂ ಇತ್ತು. ಕಾರ್ಯಕ್ರಮದಲ್ಲಿ ಕೇಕ್ ಕತ್ತರಿಸಿದ ನಂತರ, ತಮಗಿಂತ ಸುಮಾರು 40 ವರ್ಷ ಕಿರಿಯರಾದ ಮಹಾರ್ಯಮನ್ ಅವರ ಪಾದಗಳನ್ನು ಮುಟ್ಟಿ ಶಾಸಕರು ಆಶೀರ್ವಾದ ಪಡೆದರು. ಈ 11 ಸೆಕೆಂಡುಗಳ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೇಗವಾಗಿ ಹರಡಿದ್ದು, ಪರ–ವಿರೋಧದ ಚರ್ಚೆಗಳು ಶುರುವಾಗಿವೆ.

ಶಾಸಕರ ಸ್ಪಷ್ಟನೆ: ಈ ಬಗ್ಗೆ ಪ್ರತಿಕ್ರಿಯಿಸಿರುವ ಶಾಸಕ ದೇವೇಂದ್ರ ಜೈನ್, “ಇದು ಕೇವಲ ವೈಯಕ್ತಿಕ ಮತ್ತು ಸಾಂಸ್ಕೃತಿಕ ಗೌರವದ ಸಂಕೇತವಾಗಿದೆ. ಕಿರಿಯರ ಪಾದ ಮುಟ್ಟಬಾರದು ಎಂದು ಸಂವಿಧಾನದಲ್ಲಿ ಎಲ್ಲೂ ಬರೆದಿಲ್ಲ. ಮಹಾರ್ಯಮನ್ ಅವರು ನನಗಾಗಿ ಹುಟ್ಟುಹಬ್ಬದ ಹಾಡು ಹಾಡಿ ಶುಭ ಹಾರೈಸಿದಾಗ ನಾನು ಭಾವುಕನಾಗಿ ಈ ರೀತಿ ಮಾಡಿದೆ. ಇದರಲ್ಲಿ ರಾಜಕೀಯ ಹುಡುಕುವುದು ಸರಿಯಲ್ಲ,” ಎಂದು ಹೇಳಿದ್ದಾರೆ.

ಟೀಕೆ: ಆದರೆ, ಈ ವಿಡಿಯೋ ನೋಡಿರುವ ವಿರೋಧ ಪಕ್ಷದವರು ಮತ್ತು ಕೆಲ ನೆಟ್ಟಿಗರು, ಇದು “ರಾಜವಂಶದ ಗುಲಾಮಗಿರಿ” ಮತ್ತು “ಅಧಿಕಾರದ ಮುಂದೆ ಹಿರಿಯತನದ ಶರಣಾಗತಿ” ಎಂದು ಟೀಕಿಸುತ್ತಿದ್ದಾರೆ. ಕೇವಲ ರಾಜಕೀಯ ಪ್ರಭಾವಕ್ಕಾಗಿ ಹಿರಿಯರು ಕಿರಿಯರ ಕಾಲಿಗೆ ಬೀಳುತ್ತಿರುವುದು ಸಂಸ್ಕೃತಿಗೆ ವಿರುದ್ಧವಾದುದು ಎಂದು ಕೆಲವರು ಅಭಿಪ್ರಾಯಪಟ್ಟಿದ್ದಾರೆ.

ಜಾಗತಿಕ ಕನ್ನಡಿಗರ ಅಚ್ಚುಮೆಚ್ಚಿನ ಸುದ್ದಿತಾಣ ಮಹಾನಾಯಕ ಸುದ್ದಿಗಳನ್ನು ನಿಮ್ಮ ವಾಟ್ಸಾಪ್ ಗ್ರೂಪ್ ಗಳಿಗೆ ಕಳುಹಿಸಬೇಕೇ? ಹಾಗಿದ್ದರೆ, ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 9686399493 ನಂಬರ್ ಸೇರಿಸಿ.

ಗ್ರೂಪ್ ಗೆ ಜಾಯಿನ್ ಆಗಿ:

https://chat.whatsapp.com/H1duNIQRfXnJcfQKWPzNqD