ಬೆಂಗಳೂರು: ಬಿಗ್ ಬಾಸ್ ಕನ್ನಡ ಸೀಸನ್ 12 ಈಗ ಅಂತಿಮ ಘಟ್ಟಕ್ಕೆ ಬಂದು ತಲುಪಿದೆ. ಫಿನಾಲೆ ವಾರದಲ್ಲಿರುವ ಸ್ಪರ್ಧಿಗಳಿಗೆ ಬಿಗ್ ಬಾಸ್ ವಿಶೇಷ ಅವಕಾಶವೊಂದನ್ನು ನೀಡಿದ್ದರು. ಸ್ಪರ್ಧಿಗಳು ತಮ್ಮ ಮೂರು ಆಸೆಗಳನ್ನು ಬಿಗ್ ಬಾಸ್ ಮುಂದೆ ಇಡಬೇಕಾಗಿತ್ತು, ಅದರಲ್ಲಿ ಒಂದನ್ನು ಈಡೇರಿಸುವುದಾಗಿ ಬಿಗ್ ಬಾಸ್ ಭರವಸೆ ನೀಡಿದ್ದರು. ಈ ಸಂದರ್ಭದಲ್ಲಿ ಸ್ಪರ್ಧಿ ರಕ್ಷಿತಾ ಶೆಟ್ಟಿ ಇಟ್ಟ ಬೇಡಿಕೆಗಳು ಈಗ ಸಾಮಾಜಿಕ ಜಾಲತಾಣದಲ್ಲಿ ಭಾರಿ ಮೆಚ್ಚುಗೆಗೆ ಪಾತ್ರವಾಗಿವೆ.

ಮುಂಬೈನಲ್ಲಿ ಹುಟ್ಟಿ ಬೆಳೆದಿದ್ದರೂ, ಕನ್ನಡದ ಮೇಲಿರುವ ಅಭಿಮಾನ ಹಾಗೂ ಕರಾವಳಿಯ ಸಂಸ್ಕೃತಿಯ ಬಗ್ಗೆ ರಕ್ಷಿತಾ ಹೊಂದಿರುವ ಕಾಳಜಿಯನ್ನು ಕಂಡು ಪ್ರೇಕ್ಷಕರು ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ.

ರಕ್ಷಿತಾ ಶೆಟ್ಟಿ ಬಿಗ್ ಬಾಸ್ ಮುಂದೆ ಇಟ್ಟ ಆ ಮೂರು ಬೇಡಿಕೆಗಳು ಇಲ್ಲಿವೆ:

• ಮೀನುಗಾರರಿಗೆ ವೇದಿಕೆ: ಕಡಲಿನ ಮಕ್ಕಳಾದ ಮೀನುಗಾರರು ಬಿಗ್ ಬಾಸ್ ಮನೆಗೆ ಬರಬೇಕು. ಸಮುದ್ರಕ್ಕೆ ಇಳಿದಾಗ ಅವರು ಎದುರಿಸುವ ಕಷ್ಟಗಳು ಮತ್ತು ಸವಾಲುಗಳ ಬಗ್ಗೆ ಮಾತನಾಡಲು ಅವರಿಗೆ ಒಂದು ವೇದಿಕೆ ಸಿಗಬೇಕು ಎಂಬುದು ರಕ್ಷಿತಾ ಅವರ ಮೊದಲ ಆಸೆ.
• ಕರಾವಳಿಯ ಹುಲಿ ವೇಷ: ಕರಾವಳಿಯ ಸಾಂಸ್ಕೃತಿಕ ಹೆಮ್ಮೆಯಾದ ಹುಲಿ ವೇಷದ ಕಲಾವಿದರು ಬಿಗ್ ಬಾಸ್ ಮನೆಗೆ ಬರಬೇಕು ಮತ್ತು ಅವರ ಜೊತೆ ತಾನು ನೃತ್ಯ ಮಾಡಬೇಕು ಎಂದು ಕೇಳಿಕೊಂಡಿದ್ದಾರೆ.
• ಕನ್ನಡ ನಾಟಕ: ಬಿಗ್ ಬಾಸ್ ಮನೆಯಲ್ಲಿ ಒಂದು ಕನ್ನಡ ನಾಟಕವನ್ನು ನೋಡಬೇಕು ಎಂಬುದು ಅವರ ಮೂರನೇ ಬೇಡಿಕೆ. ಆರಂಭದಲ್ಲಿ ಕನ್ನಡ ಭಾಷೆಯ ವಿಚಾರವಾಗಿ ಟೀಕೆ ಎದುರಿಸಿದ್ದ ರಕ್ಷಿತಾ, ಈಗ ಕನ್ನಡ ನಾಟಕ ನೋಡುವ ಆಸೆ ವ್ಯಕ್ತಪಡಿಸುವ ಮೂಲಕ ತಮ್ಮ ಭಾಷಾ ಪ್ರೇಮವನ್ನು ಮೆರೆದಿದ್ದಾರೆ.

ರಕ್ಷಿತಾ ಅವರ ಈ ಬೇಡಿಕೆಗಳು ಅವರ ವೈಯಕ್ತಿಕ ಲಾಭಕ್ಕಿಂತ ಹೆಚ್ಚಾಗಿ, ಕಲೆ, ಸಂಸ್ಕೃತಿ ಮತ್ತು ಶ್ರಮಿಕ ವರ್ಗಕ್ಕೆ ಗೌರವ ನೀಡುವಂತಿವೆ. ಇದನ್ನು ಗಮನಿಸಿದ ವೀಕ್ಷಕರು, “ರಕ್ಷಿತಾ ಅವರ ಯೋಚನೆ ನಿಜಕ್ಕೂ ಪ್ರಬುದ್ಧತೆಯಿಂದ ಕೂಡಿದೆ” ಎಂದು ಪ್ರಶಂಸಿಸುತ್ತಿದ್ದಾರೆ. ಬಿಗ್ ಬಾಸ್ ರಕ್ಷಿತಾ ಅವರ ಯಾವ ಬೇಡಿಕೆಯನ್ನು ಈಡೇರಿಸುತ್ತಾರೆ ಎಂಬ ಕುತೂಹಲ ಈಗ ಮನೆ ಮಾಡಿದೆ.

ಜಾಗತಿಕ ಕನ್ನಡಿಗರ ಅಚ್ಚುಮೆಚ್ಚಿನ ಸುದ್ದಿತಾಣ ಮಹಾನಾಯಕ ಸುದ್ದಿಗಳನ್ನು ನಿಮ್ಮ ವಾಟ್ಸಾಪ್ ಗ್ರೂಪ್ ಗಳಿಗೆ ಕಳುಹಿಸಬೇಕೇ? ಹಾಗಿದ್ದರೆ, ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 9686399493 ನಂಬರ್ ಸೇರಿಸಿ.

ಗ್ರೂಪ್ ಗೆ ಜಾಯಿನ್ ಆಗಿ:

https://chat.whatsapp.com/H1duNIQRfXnJcfQKWPzNqD