ಮಗನಿಗೆ ಅಡಾಲ್ಟ್ ಫಿಲ್ಮ್ ನೋಡುವ ಹುಚ್ಚು: ಬೇಸತ್ತ ತಂದೆಯಿಂದಲೇ ಕ್ರೂರ ಕೃತ್ಯ; ಮಗನಿಗೆ ವಿಷ ಹಾಕಿ ಕೊಂದು ಶವವನ್ನು ಚರಂಡಿಗೆ ಎಸೆದ ಅಪ್ಪ..!
ವ್ಯಕ್ತಿಯೊಬ್ಬ ತನ್ನ 14 ವರ್ಷದ ಮಗನಿಗೇ ವಿಷ ಹಾಕಿ ಕೊಂದ ಘಟನೆ ಮಹಾರಾಷ್ಟ್ರದ ಸೋಲಾಪುರದಲ್ಲಿ ನಡೆದಿದೆ. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಆರೋಪಿ ತಂದೆಯನ್ನು ಬಂಧಿಸಲಾಗಿದೆ. ಮೃತ ವಿದ್ಯಾರ್ಥಿ ತನ್ನ ಫೋನ್ ನಲ್ಲಿ ವಯಸ್ಕರ ಸಿನಿಮಾಗಳನ್ನು (Adults Film) ನೋಡುತ್ತಿದ್ದ. ಹೀಗಾಗಿ ಅವನ ನಡವಳಿಕೆಯ ಬಗ್ಗೆ ಶಾಲೆಯಲ್ಲಿ ದೂರುಗಳು ಬರುತ್ತಿದ್ದ ಮಗನನ್ನು ತಾನು ಕೊಂದಿದ್ದೇನೆ ಎಂದು ಆರೋಪಿ ತಂದೆ ಹೇಳಿದ್ದಾರೆ ಪೊಲೀಸರು ತಿಳಿಸಿದ್ದಾರೆ.
ಆರೋಪಿಯನ್ನು ವಿಜಯ್ ಬಟ್ಟು ಎಂದು ಗುರುತಿಸಲಾಗಿದ್ದು, ಈತ ಟೈಲರ್ ಆಗಿ ಕೆಲಸ ಮಾಡುತ್ತಿದ್ದು, ಪತ್ನಿ ಮತ್ತು ಇಬ್ಬರು ಮಕ್ಕಳೊಂದಿಗೆ ಸೋಲಾಪುರ ನಗರದಲ್ಲಿ ವಾಸಿಸುತ್ತಿದ್ದ.
ಈ ವ್ಯಕ್ತಿ ಆರಂಭದಲ್ಲಿ ತನ್ನ 14 ವರ್ಷದ ಮಗ ವಿಶಾಲ್ ನನ್ನು ಕೊಲೆ ಮಾಡಿದ್ದನ್ನು ಪತ್ನಿ ಮತ್ತು ಪೊಲೀಸರಿಂದ ಮರೆಮಾಚಿದ್ದ. ಜನವರಿ 13 ರಂದು ವಿಜಯ್ ಮತ್ತು ಅವರ ಪತ್ನಿ ತಮ್ಮ ಮಗ ಕಾಣೆಯಾಗಿದ್ದಾನೆ ಎಂದು ದೂರು ನೀಡಲು ಪೊಲೀಸ್ ಠಾಣೆಗೆ ಹೋಗಿದ್ದರು.
ಅವರ ದೂರಿನ ಆಧಾರದ ಮೇಲೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದರು. ಕೆಲವು ದಿನಗಳ ನಂತರ, ದಂಪತಿಯ ಮನೆಯ ಬಳಿಯ ಚರಂಡಿಯಲ್ಲಿ ಹುಡುಗನ ಶವವನ್ನು ಪೊಲೀಸರು ಪತ್ತೆ ಮಾಡಿದ್ದರು.
ವಿಶಾಲ್ ಅವರ ದೇಹದೊಳಗೆ ಸೋಡಿಯಂ ನೈಟ್ರೇಟ್ ಎಂಬ ವಿಷ ಪತ್ತೆಯಾಗಿದೆ ಎಂದು ಮರಣೋತ್ತರ ವರದಿ ಬಹಿರಂಗಪಡಿಸಿದೆ. ನಂತರ ಪೊಲೀಸರು ಕೊಲೆ ಪ್ರಕರಣವನ್ನು ದಾಖಲಿಸಿ ವಿಜಯ್ ಅವರ ಕುಟುಂಬ ಮತ್ತು ನೆರೆಹೊರೆಯವರನ್ನು ಪ್ರಶ್ನಿಸಲು ಪ್ರಾರಂಭಿಸಿದರು.
ವಿಚಾರಣೆಯ ಸಮಯದಲ್ಲಿ, ವಿಜಯ್ ನೀಡಿದ ಮಾಹಿತಿಯಲ್ಲಿ ವ್ಯತ್ಯಾಸಗಳನ್ನು ಪೊಲೀಸರು ಗಮನಿಸಿದ್ದಾರೆ.
ಪೊಲೀಸರು ತನಿಖೆ ಮುಂದುವರಿಸುತ್ತಿದ್ದಂತೆ, ವಿಜಯ್ ಜನವರಿ 28 ರಂದು ತನ್ನ ಮಗನನ್ನು ಕೊಂದಿರುವುದಾಗಿ ಒಪ್ಪಿಕೊಂಡಿದ್ದಾನೆ.
ಶಾಲೆಯಿಂದ ತನ್ನ ಮಗನ ಬಗ್ಗೆ ದೂರುಗಳು ಬಂದ ಬಗ್ಗೆ ವಿಜಯ್ ದುಃಖಿತನಾಗಿದ್ದ. ಮನೆಯಲ್ಲಿ ವಿಶಾಲ್ ಅವರ ನಡವಳಿಕೆ ಮತ್ತು ವಯಸ್ಕರ ಚಲನಚಿತ್ರಗಳ ವ್ಯಸನದ ಬಗ್ಗೆ ವಿಜಯ್ ಅಸಮಾಧಾನ ಹೊಂದಿದ್ದರು.
ಜನವರಿ 13ರಂದು ಬೆಳಗ್ಗೆ ವಿಜಯ್ ತನ್ನ ಮಗನನ್ನು ಬೈಕ್‌ನಲ್ಲಿ ಕರೆದೊಯ್ದು ಸೋಡಿಯಂ ನೈಟ್ರೇಟ್ ಬೆರೆಸಿದ ತಂಪು ಪಾನೀಯವನ್ನು ನೀಡಿದ್ದಾನೆ. ವಿಶಾಲ್ ಪ್ರಜ್ಞೆ ತಪ್ಪಿದಾಗ, ವಿಜಯ್ ಶವವನ್ನು ಅವರ ಮನೆಯ ಬಳಿಯ ಚರಂಡಿಗೆ ಎಸೆದಿದ್ದಾನೆ.
ನಂತರ ವಿಜಯ್ ಪತ್ನಿ ಕೀರ್ತಿ ತನ್ನ ಪತಿಯ ತಪ್ಪೊಪ್ಪಿಗೆಯ ಬಗ್ಗೆ ಪೊಲೀಸರಿಗೆ ಮಾಹಿತಿ ನೀಡಿದರು. ಪೊಲೀಸರು ವಿಜಯ್ ಅವರನ್ನು ಬಂಧಿಸಿ ಮ್ಯಾಜಿಸ್ಟ್ರೇಟ್ ನ್ಯಾಯಾಲಯಕ್ಕೆ ಹಾಜರುಪಡಿಸಿದರು. ನ್ಯಾಯಾಲಯವು ಅವರನ್ನು ಎರಡು ದಿನಗಳ ಪೊಲೀಸ್ ಕಸ್ಟಡಿಗೆ ನೀಡಿದೆ.
