ದೆಹಲಿಯಲ್ಲಿ ದಟ್ಟ ಮಂಜು: 110 ವಿಮಾನಗಳು, 25 ರೈಲುಗಳ ಪ್ರಯಾಣದಲ್ಲಿ ಏರುಪೇರು
ದೆಹಲಿ-ಎನ್ಸಿಆರ್ ಪ್ರದೇಶದಲ್ಲಿ ದಟ್ಟ ಮಂಜು ಆವರಿಸಿದ್ದರಿಂದ ದೆಹಲಿಯ ಇಂದಿರಾ ಗಾಂಧಿ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ವಿಮಾನಗಳ ಪ್ರಯಾಣ ವಿಳಂಬವಾಯಿತು.
ದಟ್ಟ ಮಂಜಿನಿಂದಾಗಿ ದೆಹಲಿ ವಿಮಾನ ನಿಲ್ದಾಣವು (ದೇಶೀಯ ಮತ್ತು ಅಂತರರಾಷ್ಟ್ರೀಯ) ಆಗಮನ ಮತ್ತು ನಿರ್ಗಮನದ ಸುಮಾರು 110 ವಿಮಾನಗಳ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಿದೆ ಎಂದು ದೆಹಲಿ ವಿಮಾನ ನಿಲ್ದಾಣ ಎಫ್ಐಡಿಎಸ್ (ಫ್ಲೈಟ್ ಇನ್ಫಾರ್ಮೇಶನ್ ಡಿಸ್ಪ್ಲೇ ಸಿಸ್ಟಮ್) ಅಂಕಿ ಅಂಶಗಳು ತಿಳಿಸಿವೆ. ದೆಹಲಿಯ 25 ರೈಲುಗಳು ಮಂಜಿನ ಪರಿಸ್ಥಿತಿಯಿಂದಾಗಿ ತಡವಾಗಿ ಚಲಿಸುತ್ತಿವೆ.
ರಾಷ್ಟ್ರ ರಾಜಧಾನಿ ಪ್ರದೇಶದಲ್ಲಿ ಶೀತಗಾಳಿ ಪರಿಸ್ಥಿತಿಗಳು ಮುಂದುವರೆದಿದ್ದು, ನಗರದಲ್ಲಿ ಕನಿಷ್ಠ ತಾಪಮಾನವು 7 ಡಿಗ್ರಿ ಸೆಲ್ಸಿಯಸ್ ಗೆ ಇಳಿದಿದೆ. ಉತ್ತರ ಪ್ರದೇಶ, ಬಿಹಾರ, ರಾಜಸ್ಥಾನ, ಉತ್ತರಾಖಂಡ ಮತ್ತು ದೆಹಲಿ-ಎನ್ಸಿಆರ್ ನಲ್ಲಿ ತಾಪಮಾನವು ಕುಸಿಯುತ್ತಿರುವುದರಿಂದ ಇಡೀ ಉತ್ತರ ಭಾರತವು ಶೀತ ಅಲೆಯನ್ನು ಎದುರಿಸುತ್ತಿದೆ.
ದೆಹಲಿಯ ಅನೇಕ ಸ್ಥಳಗಳಲ್ಲಿ ದಟ್ಟ ಮಂಜು ಕವಿದಿದೆ ಎಂದು ಪ್ರಾದೇಶಿಕ ಹವಾಮಾನ ಇಲಾಖೆ ತಿಳಿಸಿದೆ.
ನಗರದ ವಿವಿಧ ಭಾಗಗಳಿಂದ ಬಂದ ದೃಶ್ಯಗಳು ಪ್ರಯಾಣಿಕರು ತಮ್ಮ ವಾಹನಗಳ ಹೆಡ್ ಲೈಟ್ ಗಳನ್ನು ಆನ್ ಮಾಡಿ ರಸ್ತೆಗಳಲ್ಲಿ ಚಲಿಸುತ್ತಿರುವುದನ್ನು ತೋರಿಸಿತು.
