ಉದ್ಯೋಗಕ್ಕಾಗಿ ಭೂಮಿ ಹಗರಣ: ಲಾಲು ಕುಟುಂಬದ ಸಹಚರನನ್ನು ಬಂಧಿಸಿದ ತನಿಖಾ ಸಂಸ್ಥೆ
ರಾಷ್ಟ್ರೀಯ ಜನತಾ ದಳ (ಆರ್ ಜೆಡಿ) ಮುಖ್ಯಸ್ಥ ಲಾಲು ಪ್ರಸಾದ್ ಯಾದವ್ ಮತ್ತು ಅವರ ಪುತ್ರ ತೇಜಸ್ವಿ ಯಾದವ್ ಅವರೊಂದಿಗೆ ನಿಕಟ ಸಂಪರ್ಕ ಹೊಂದಿರುವ ಉದ್ಯಮಿ ಅಮಿತ್ ಕತ್ಯಾಲ್ ಅವರನ್ನು ಜಾರಿ ನಿರ್ದೇಶನಾಲಯ (ಇಡಿ) ಬಂಧಿಸಿದೆ.
ತನಿಖಾ ಸಂಸ್ಥೆಯ ಪ್ರಕಾರ ಅಮಿತ್ ಕತ್ಯಾಲ್ ಅವರ ಕಂಪನಿಯು ಉದ್ಯೋಗಕ್ಕಾಗಿ ಭೂಮಿ ಹಗರಣದಲ್ಲಿ ಅಕ್ರಮ ಹಣ ವರ್ಗಾವಣೆಯಲ್ಲಿ ಭಾಗಿಯಾಗಿದೆ. ಎಕೆ ಇನ್ಫೋಸಿಸ್ಟಮ್ ಎಂಬ ಕಂಪನಿಯು ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಅಕ್ರಮ ಹಣ ವರ್ಗಾವಣೆ ವಿರೋಧಿ ಸಂಸ್ಥೆ ಮತ್ತು ಕೇಂದ್ರ ತನಿಖಾ ದಳ (ಸಿಬಿಐ) ಸ್ಕ್ಯಾನರ್ ಮತ್ತು ತನಿಖೆಯಲ್ಲಿದೆ.
ಏಜೆನ್ಸಿಯು ಈ ಹಿಂದೆ ಕತ್ಯಾಲ್ ಅವರಿಗೆ ಅನೇಕ ಸಮನ್ಸ್ ಗಳನ್ನು ನೀಡಿತ್ತು. ಅಲ್ಲದೇ ಅವರು ಸುಮಾರು ಎರಡು ತಿಂಗಳುಗಳಿಂದ ಏಜೆನ್ಸಿಯ ಸಮನ್ಸ್ ನಿಂದ ತಪ್ಪಿಸಿಕೊಂಡಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಜಾರಿ ನಿರ್ದೇಶನಾಲಯದ ಪ್ರಕಾರ, ಕತ್ಯಾಲ್ ಆರ್ ಜೆಡಿ ಮುಖ್ಯಸ್ಥ ಮತ್ತು ಬಿಹಾರದ ಮಾಜಿ ಮುಖ್ಯಮಂತ್ರಿ ಲಾಲು ಯಾದವ್ ಅವರ “ನಿಕಟ ಸಹವರ್ತಿ” ಆಗಿದ್ದಾರೆ.
ಮಾರ್ಚ್ ನಲ್ಲಿ ಕೇಂದ್ರ ಸಂಸ್ಥೆ ದಾಳಿ ನಡೆಸಿದ ಕತ್ಯಾಲ್ ಅವರ ಕಂಪನಿಯ ಆವರಣದಲ್ಲಿ ಲಾಲು ಯಾದವ್, ಮಗ ತೇಜಸ್ವಿ ಯಾದವ್, ಅವರ ಸಹೋದರಿಯರು ಮತ್ತು ಇತರರ ಆವರಣವೂ ಸೇರಿದೆ ಎಂದು ಅಧಿಕಾರಿ ಈ ಹಿಂದೆ ತಿಳಿಸಿದ್ದರು.
ಈ ಆಸ್ತಿಯನ್ನು ಮೆಸರ್ಸ್ ಎಬಿ ಎಕ್ಸ್ಪೋರ್ಟ್ಸ್ ಪ್ರೈವೇಟ್ ಲಿಮಿಟೆಡ್ ಮತ್ತು ಮೆಸರ್ಸ್ ಎಕೆ ಇನ್ಫೋಸಿಸ್ಟಮ್ಸ್ ಪ್ರೈವೇಟ್ ಲಿಮಿಟೆಡ್ ಕಚೇರಿ ಎಂದು ಕಾಗದದ ಮೇಲೆ ಘೋಷಿಸಲಾಗಿದ್ದರೂ, ಇದನ್ನು ಲಾಲು ಪ್ರಸಾದ್ ಯಾದವ್ ಅವರ ಪುತ್ರ ತೇಜಸ್ವಿ ಪ್ರಸಾದ್ ಯಾದವ್ ಪ್ರತ್ಯೇಕವಾಗಿ ವಸತಿ ಆವರಣವಾಗಿ ಬಳಸುತ್ತಿದ್ದಾರೆ ಎಂದು ಜಾರಿ ನಿರ್ದೇಶನಾಲಯದ ಹೇಳಿಕೆ ತಿಳಿಸಿದೆ.
