ಪ್ರತಿಭೆಗೆ ಬಡತನ ಅಡ್ಡಿಯಲ್ಲ ಇಂಡಿಯನ್ ಪ್ರೀಮಿಯರ್ ಲೀಗ್ (IPL) ಕೇವಲ ಕ್ರಿಕೆಟ್ ಪಂದ್ಯಾವಳಿಯಲ್ಲ, ಇದು ಅದೆಷ್ಟೋ ಬಡ ಪ್ರತಿಭೆಗಳ ಪಾಲಿಗೆ ಸಂಜೀವಿನಿ. ಈ ಬಾರಿಯ ಐಪಿಎಲ್ ಹರಾಜಿನಲ್ಲಿ ಉತ್ತರ ಪ್ರದೇಶದ ಗೋರಖ್‌ ಪುರದ ಹಳ್ಳಿಯೊಂದರ ಯುವಕ ವಿಶಾಲ್ ನಿಶಾದ್ ಆಯ್ಕೆಯಾಗುವ ಮೂಲಕ ಇಡೀ ದೇಶದ ಗಮನ ಸೆಳೆದಿದ್ದಾರೆ. ಒಬ್ಬ ಸಾಮಾನ್ಯ ಕಟ್ಟಡ ಮೇಸ್ತ್ರಿಯ ಮಗನಾಗಿ, ಕಡು ಬಡತನದ ನಡುವೆಯೂ ಕ್ರಿಕೆಟ್ ಕನಸು ಕಂಡು, ಇಂದು ಕೋಟ್ಯಂತರ ರೂಪಾಯಿ ಮೌಲ್ಯದ ಲೀಗ್‌ ಗೆ ಪಾದಾರ್ಪಣೆ ಮಾಡುತ್ತಿರುವ ವಿಶಾಲ್ ಅವರ ಪಯಣ ಅತ್ಯಂತ ಸ್ಪೂರ್ತಿದಾಯಕವಾಗಿದೆ.

ಹೊಲಗಳೇ ಈತನ ಕ್ರೀಡಾಂಗಣ, ವಿಶಾಲ್ ನಿಶಾದ್ ಗೋರಖ್‌ಪುರ ಜಿಲ್ಲೆಯ ಖೋರಾಬಾರ್ ವ್ಯಾಪ್ತಿಯ ‘ಜಂಗಲ್ ಅಯೋಧ್ಯಾ ಪ್ರಸಾದ್’ ಎಂಬ ಪುಟ್ಟ ಗ್ರಾಮದವರು. ತಂದೆ ಉಮೇಶ್ ಕುಮಾರ್ ನಿಶಾದ್ ದಿನಗೂಲಿ ಮೇಸ್ತ್ರಿಯಾಗಿ ಕೆಲಸ ಮಾಡುತ್ತಿದ್ದರೆ, ತಾಯಿ ಸುನೀತಾ ಗೃಹಿಣಿ. ಮನೆಯಲ್ಲಿ ತೀವ್ರ ಆರ್ಥಿಕ ಮುಗ್ಗಟ್ಟಿದ್ದರೂ ವಿಶಾಲ್ ಅವರಿಗೆ ಕ್ರಿಕೆಟ್ ಮೇಲಿನ ವ್ಯಾಮೋಹ ಕಡಿಮೆಯಾಗಲಿಲ್ಲ. ಬಾಲ್ಯದಲ್ಲಿ ತಂದೆಗೆ ಕೆಲಸದಲ್ಲಿ ನೆರವಾಗುತ್ತಲೇ, ಬಿಡುವಿನ ವೇಳೆಯಲ್ಲಿ ಹಳ್ಳಿಯ ಹೊಲಗಳಲ್ಲಿ ಗೆಳೆಯರೊಂದಿಗೆ ಕ್ರಿಕೆಟ್ ಆಡುತ್ತಿದ್ದರು. ತಂದೆ ಮಗನ ಆಸೆಯನ್ನು ಗುರುತಿಸಿ, ತುತ್ತು ಅನ್ನದ ಹಣ ಉಳಿಸಿ ಮಗನಿಗೆ ಪ್ರೋತ್ಸಾಹ ನೀಡಿದ್ದರು.

ತರಬೇತಿ ಮತ್ತು ಗುರುವಿನ ಮಾರ್ಗದರ್ಶನ ಆರ್ಥಿಕ ಅಡಚಣೆಯಿಂದಾಗಿ ವ್ಯವಸ್ಥಿತ ತರಬೇತಿ ಪಡೆಯುವುದು ವಿಶಾಲ್ ಅವರಿಗೆ ಅಸಾಧ್ಯವಾಗಿತ್ತು. ಆದರೆ, ಇವರಲ್ಲಿದ್ದ ನೈಜ ಪ್ರತಿಭೆಯನ್ನು ಗುರುತಿಸಿದ ತರಬೇತುದಾರ ಕಲ್ಯಾಣ್ ಸಿಂಗ್ ಅವರು ವಿಶಾಲ್ ಜೀವನಕ್ಕೆ ದೊಡ್ಡ ತಿರುವು ನೀಡಿದರು. ವಿಶಾಲ್ ಅವರ ಪರಿಸ್ಥಿತಿಯನ್ನು ಅರಿತ ಕಲ್ಯಾಣ್ ಸಿಂಗ್, ಯಾವುದೇ ಶುಲ್ಕವಿಲ್ಲದೆ ಉಚಿತವಾಗಿ ತರಬೇತಿ ನೀಡಲು ಮುಂದೆ ಬಂದರು. ಎಡಗೈ ಸ್ಪಿನ್ನರ್ ಆಗಿರುವ ವಿಶಾಲ್, ಶಾಲೆಯ ಅಕಾಡೆಮಿಯಲ್ಲಿ ತಮ್ಮ ಬೌಲಿಂಗ್ ಕೌಶಲ್ಯವನ್ನು ಹದಗೊಳಿಸಿಕೊಂಡರು. ನಂತರ ಹೆಚ್ಚಿನ ತರಬೇತಿಗಾಗಿ ಕಾನ್ಪುರಕ್ಕೆ ತೆರಳಿ ಅಲ್ಲಿನ ಕ್ರಿಕೆಟ್ ಅಕಾಡೆಮಿಯಲ್ಲಿ ಪರಿಣಿತಿ ಪಡೆದರು.

ಐಪಿಎಲ್ ಆಯ್ಕೆ ಮತ್ತು ಯುಪಿ ಟಿ–20 ಪ್ರದರ್ಶನ ವಿಶಾಲ್ ಅವರ ವೃತ್ತಿಜೀವನಕ್ಕೆ ಯುಪಿ ಟಿ–20 ಲೀಗ್ ಭದ್ರ ಬುನಾದಿ ಹಾಕಿತು. ಗೋರಖ್‌ಪುರ ಲಯನ್ಸ್ ಪರ ಆಡಿದ ಇವರು, ನಿತೀಶ್ ರಾಣಾ ಅವರಂತಹ ಘಟಾನುಘಟಿ ಬ್ಯಾಟರ್‌ಗಳನ್ನು ಒಳಗೊಂಡಂತೆ ಕೇವಲ ನಾಲ್ಕು ಪಂದ್ಯಗಳಲ್ಲಿ ಎಂಟು ವಿಕೆಟ್ ಕಬಳಿಸಿ ಸಂಚಲನ ಸೃಷ್ಟಿಸಿದ್ದರು. ಇವರ ಈ ಅಮೋಘ ಪ್ರದರ್ಶನವು ಐಪಿಎಲ್ ಸ್ಕೌಟ್ಸ್‌ಗಳ ಕಣ್ಣಿಗೆ ಬಿದ್ದಿತು. ಪರಿಣಾಮವಾಗಿ, ಇತ್ತೀಚೆಗೆ ನಡೆದ ಮಿನಿ ಹರಾಜಿನಲ್ಲಿ ಪಂಜಾಬ್ ಕಿಂಗ್ಸ್ ತಂಡವು ವಿಶಾಲ್ ನಿಶಾದ್ ಅವರನ್ನು 30 ಲಕ್ಷ ರೂಪಾಯಿ ಮೂಲ ಬೆಲೆಗೆ ಖರೀದಿಸಿತು. ಈ ಸುದ್ದಿ ತಿಳಿಯುತ್ತಿದ್ದಂತೆ ಹಳ್ಳಿಯಲ್ಲಿ ಸಂಭ್ರಮ ಮನೆಮಾಡಿದೆ.

ಜಾಗತಿಕ ಕನ್ನಡಿಗರ ಅಚ್ಚುಮೆಚ್ಚಿನ ಸುದ್ದಿತಾಣ ಮಹಾನಾಯಕ ಸುದ್ದಿಗಳನ್ನು ನಿಮ್ಮ ವಾಟ್ಸಾಪ್ ಗ್ರೂಪ್ ಗಳಿಗೆ ಕಳುಹಿಸಬೇಕೇ? ಹಾಗಿದ್ದರೆ, ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 9686399493 ನಂಬರ್ ಸೇರಿಸಿ.

ಗ್ರೂಪ್ ಗೆ ಜಾಯಿನ್ ಆಗಿ:

https://chat.whatsapp.com/H1duNIQRfXnJcfQKWPzNqD