ರೋಮ್/ನವದೆಹಲಿ: ಇಟಲಿಯ ಪ್ರಧಾನ ಮಂತ್ರಿ ಜಾರ್ಜಿಯಾ ಮೆಲೋನಿ ಅವರು ತಮ್ಮ ಹೊಸ ಪುಸ್ತಕವಾದ ‘ಜಾರ್ಜಿಯಾಸ್ ವಿಷನ್’ (Giorgia’s Vision) ನಲ್ಲಿ 2023ರ ಭಾರತ ಪ್ರವಾಸದ ಸ್ವಾರಸ್ಯಕರ ಪ್ರಸಂಗವೊಂದನ್ನು ನೆನಪಿಸಿಕೊಂಡಿದ್ದಾರೆ. ತಾವು ಭಾರತಕ್ಕೆ ಭೇಟಿ ನೀಡಿದಾಗ ದೆಹಲಿಯ ರಸ್ತೆಗಳಲ್ಲಿ ತಮ್ಮ ಸ್ವಾಗತದ ಪೋಸ್ಟರ್ ಗಳು ರಾರಾಜಿಸುತ್ತಿದ್ದದ್ದನ್ನು ಕಂಡು, ಇಟಲಿಯ ಉಪ ಪ್ರಧಾನಿ ತಮಾಷೆ ಮಾಡಿದ್ದ ಸಂಗತಿಯನ್ನು ಅವರು ಪುಸ್ತಕದಲ್ಲಿ ಬರೆದುಕೊಂಡಿದ್ದಾರೆ.

ಪತ್ರಕರ್ತ ಅಲೆಸ್ಸಾಂಡ್ರೊ ಸಲ್ಲುಸ್ತಿ ಅವರೊಂದಿಗಿನ ಸಂಭಾಷಣೆಯ ಆಧಾರದ ಮೇಲೆ ಈ ಪುಸ್ತಕವನ್ನು ಬರೆಯಲಾಗಿದೆ. ಮೆಲೋನಿ ಅವರು ಪುಸ್ತಕದ ಒಂದು ಅಧ್ಯಾಯದಲ್ಲಿ ಹೀಗೆ ಬರೆದಿದ್ದಾರೆ: “ನಾನು ದೆಹಲಿಗೆ ಬಂದಿಳಿದಾಗ, ರಸ್ತೆಯ ಇಕ್ಕೆಲಗಳಲ್ಲಿ ಪ್ರತಿ ಕೆಲವು ಅಡಿಗಳಿಗೂ ನನ್ನ ಮುಖವಿರುವ ‘ಸ್ವಾಗತ’ (Welcome) ಎಂಬ ಪೋಸ್ಟರ್ಗಳನ್ನು ಹಾಕಲಾಗಿತ್ತು. ಇನ್ನು ನಾನು ಅಲ್ಲಿಂದ ಹೊರಡುವಾಗ, ಅದೇ ಚಿತ್ರವಿದ್ದ ಪೋಸ್ಟರ್ಗಳಲ್ಲಿ ‘ಭೇಟಿಗೆ ಧನ್ಯವಾದಗಳು’ (Thank you for visiting) ಎಂದು ಬರೆಯಲಾಗಿತ್ತು.”
ಇದನ್ನು ಗಮನಿಸಿದ ನನ್ನ ಸಹೋದ್ಯೋಗಿ ಹಾಗೂ ಇಟಲಿಯ ಉಪ ಪ್ರಧಾನಿ ಆಂಟೋನಿಯೊ ತಾಜಾನಿ, “ಇಷ್ಟೊಂದು ಪೋಸ್ಟರ್ಗಳನ್ನು ನೋಡಿದರೆ, ನೀವು ಒಂದು ವೇಳೆ ನವದೆಹಲಿ ಕ್ಷೇತ್ರದಿಂದ ಚುನಾವಣೆಗೆ ಸ್ಪರ್ಧಿಸಿದರೆ ಖಂಡಿತವಾಗಿಯೂ ಹತ್ತು ಲಕ್ಷ (ಒಂದು ಮಿಲಿಯನ್) ಮತಗಳನ್ನು ಗೆದ್ದುಬಿಡುತ್ತೀರಿ!” ಎಂದು ತಮಾಷೆ ಮಾಡಿದ್ದರು ಎಂದು ಮೆಲೋನಿ ನೆನಪಿಸಿಕೊಂಡಿದ್ದಾರೆ.

ಜಾರ್ಜಿಯಾ ಮೆಲೋನಿ ಅವರು 2023 ರಲ್ಲಿ ಎರಡು ಬಾರಿ ಭಾರತಕ್ಕೆ ಭೇಟಿ ನೀಡಿದ್ದರು. ಮಾರ್ಚ್ನಲ್ಲಿ ‘ರೈಸಿನಾ ಡೈಲಾಗ್’ ಮತ್ತು ಸೆಪ್ಟೆಂಬರ್ ನಲ್ಲಿ ನಡೆದ ಜಿ–20 (G20) ಶೃಂಗಸಭೆಯಲ್ಲಿ ಅವರು ಭಾಗವಹಿಸಿದ್ದರು. ಭಾರತದ ಪ್ರಧಾನಿ ನರೇಂದ್ರ ಮೋದಿ ಅವರೊಂದಿಗೆ ಅತ್ಯುತ್ತಮ ಸ್ನೇಹ ಬಾಂಧವ್ಯ ಹೊಂದಿರುವ ಮೆಲೋನಿ ಅವರನ್ನು ಸೋಶಿಯಲ್ ಮೀಡಿಯಾದಲ್ಲಿ ನೆಟ್ಟಿಗರು ಪ್ರೀತಿಯಿಂದ ‘ಮೆಲೋಡಿ’ (Melodi) ಎಂದು ಕರೆಯುವುದು ಎಲ್ಲರಿಗೂ ತಿಳಿದೇ ಇದೆ.

ರಾಜತಾಂತ್ರಿಕತೆಯಲ್ಲಿ ಕೇವಲ ಔಪಚಾರಿಕ ನಿಯಮಗಳಷ್ಟೇ ಮುಖ್ಯವಲ್ಲ, ಜನರೊಂದಿಗೆ ವೈಯಕ್ತಿಕವಾಗಿ ಕನೆಕ್ಟ್ ಆಗುವುದು ಮುಖ್ಯ ಎಂದು ಅವರು ಈ ಪುಸ್ತಕದಲ್ಲಿ ಅಭಿಪ್ರಾಯಪಟ್ಟಿದ್ದಾರೆ.

ಈ ಪುಸ್ತಕದಲ್ಲಿ ಭಾರತ ಮಾತ್ರವಲ್ಲದೆ ಜಗತ್ತಿನ ಇತರ ಪ್ರಮುಖ ನಾಯಕರೊಂದಿಗಿನ ತಮ್ಮ ಒಡನಾಟವನ್ನೂ ಮೆಲೋನಿ ಹಂಚಿಕೊಂಡಿದ್ದಾರೆ, ಟುನೀಶಿಯಾ ಅಧ್ಯಕ್ಷ ಕೈಸ್ ಸೈದ್ ಅವರೊಂದಿಗೆ ದೀರ್ಘಕಾಲದ ಚರ್ಚೆಯ ಬಳಿಕ ಕಾಫಿ ಮತ್ತು ಸಿಗರೇಟ್ ಸೇವಿಸುತ್ತಾ ಮಾತುಕತೆ ನಡೆಸಿದ್ದು ತಮ್ಮ ಸ್ನೇಹ ಗಟ್ಟಿಯಾಗಲು ಕಾರಣವಾಯಿತು ಎಂದಿದ್ದಾರೆ.
ಮಾಜಿ ಜಪಾನ್ ಪ್ರಧಾನಿ ಫುಮಿಯೊ ಕಿಶಿದಾ ಅವರು ಮೆಲೋನಿ ಅವರ ಮಗಳು ಜಿನೆವ್ರಾಗೆ ದೊಡ್ಡ ‘ಹಲೋ ಕಿಟ್ಟಿ’ (Hello Kitty) ಗೊಂಬೆಯನ್ನು ಉಡುಗೊರೆಯಾಗಿ ನೀಡಿದ್ದನ್ನು ನೆನೆದಿದ್ದಾರೆ.

ತಮಗೆ ‘ಲಾರ್ಡ್ ಆಫ್ ದಿ ರಿಂಗ್ಸ್’ (The Lord of the Rings) ಮತ್ತು ಟೋಲ್ಕೀನ್ ಅವರ ಕಾದಂಬರಿಗಳೆಂದರೆ ತುಂಬಾ ಇಷ್ಟ ಎಂದು ತಿಳಿದ ಪೋಲೆಂಡ್ ಪ್ರಧಾನಿ ಮೊರಾವಿಕಿ ಅವರು, ವಾರ್ಸಾದಲ್ಲಿ ಅದೇ ಥೀಮ್ನ ಕೆಫೆಗೆ ಕರೆದೊಯ್ದಿದ್ದನ್ನು ನೆನಪಿಸಿಕೊಂಡಿದ್ದಾರೆ.
ರೂಪಾ ಪಬ್ಲಿಕೇಷನ್ಸ್ (Rupa Publications) ಪ್ರಕಟಿಸಿರುವ ಈ ಪುಸ್ತಕವು ಸದ್ಯ ಮಾರುಕಟ್ಟೆಯಲ್ಲಿ ಹಾಗೂ ಆನ್ ಲೈನ್ ನಲ್ಲಿ ಲಭ್ಯವಿದೆ.

ಜಾಗತಿಕ ಕನ್ನಡಿಗರ ಅಚ್ಚುಮೆಚ್ಚಿನ ಸುದ್ದಿತಾಣ ಮಹಾನಾಯಕ ಸುದ್ದಿಗಳನ್ನು ನಿಮ್ಮ ವಾಟ್ಸಾಪ್ ಗ್ರೂಪ್ ಗಳಿಗೆ ಕಳುಹಿಸಬೇಕೇ? ಹಾಗಿದ್ದರೆ, ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 9686399493 ನಂಬರ್ ಸೇರಿಸಿ.

ಗ್ರೂಪ್ ಗೆ ಜಾಯಿನ್ ಆಗಿ:

https://chat.whatsapp.com/H1duNIQRfXnJcfQKWPzNqD