ಮುಂಬಯಿ: ಆದಾಯ ತೆರಿಗೆ ಸಲ್ಲಿಕೆಯ ಅವಧಿ ಹತ್ತಿರ ಬರುತ್ತಿದ್ದಂತೆ, ಜಿಯೋ ಫೈನಾನ್ಸ್ ತೆರಿಗೆದಾರರಿಗೆ ಭರ್ಜರಿ ಕೊಡುಗೆಯೊಂದನ್ನು ನೀಡಿದೆ. ಎಲ್ಲ ಆದಾಯ ವರ್ಗದ ಜನರಿಗೆ ಅನುಕೂಲವಾಗುವಂತೆ ಕೇವಲ 24 ರೂಪಾಯಿಗಳ ಆರಂಭಿಕ ಶುಲ್ಕದಲ್ಲಿ ತಜ್ಞರ ನೆರವಿನೊಂದಿಗೆ ಐಟಿ ರಿಟರ್ನ್ (ITR) ಸಲ್ಲಿಕೆಯ ಹೊಸ ಡಿಜಿಟಲ್ ಸೇವೆಯನ್ನು ಆರಂಭಿಸಿದೆ.

ಯಾವುದೇ ಕಾಗದಪತ್ರಗಳಿಲ್ಲದೆ ಸಂಪೂರ್ಣ ಡಿಜಿಟಲ್ ರೂಪದಲ್ಲಿ ಐಟಿಆರ್ ಸಲ್ಲಿಕೆ ಹಾಗೂ ಹಣಕಾಸು ವರ್ಷದ ಯೋಜನೆಗಳನ್ನು ಸರಳಗೊಳಿಸಲು ಈ ಪ್ಲಾಟ್‌ಫಾರ್ಮ್ ನೆರವಾಗಲಿದೆ. ಇದರಲ್ಲಿ ಸ್ವಯಂ-ಸೇವಾ (Do-It-Yourself) ಆಯ್ಕೆಗಳು ₹24 ರಿಂದ ಆರಂಭವಾಗಲಿದ್ದು, ಆದಾಯ ತೆರಿಗೆ ಇಲಾಖೆಯ ಪೋರ್ಟಲ್‌ನಿಂದಲೇ ಅಗತ್ಯ ದತ್ತಾಂಶಗಳನ್ನು ಪಡೆದುಕೊಳ್ಳಲಿವೆ.

ಶೇ. 25ರಷ್ಟು ಜಿಯೋ ಪಾಯಿಂಟ್ಸ್ ಲಾಭ:

ಈ ವರ್ಷದ ವಿಶೇಷತೆಯೆಂದರೆ, ಜಿಯೋ ತನ್ನ ರಿವಾರ್ಡ್ ಇಕೋಸಿಸ್ಟಂ ಅನ್ನು ಈ ಸೇವೆಗೆ ಜೋಡಿಸಿದೆ. ಗ್ರಾಹಕರು ತಾವು ಪಾವತಿಸುವ ಒಟ್ಟು ಶುಲ್ಕದ ಮೇಲೆ ಶೇ. 25 ರವರೆಗೆ ಜಿಯೋ ಪಾಯಿಂಟ್ಸ್‌ಗಳ ಪ್ರಯೋಜನ ಪಡೆಯಬಹುದು. ಈ ಅಂಕಗಳನ್ನು ಆಪ್‌ನಲ್ಲಿಯೇ ಜನಪ್ರಿಯ ಬ್ರಾಂಡ್ ವೋಚರ್‌ಗಳು ಹಾಗೂ ಶಾಪಿಂಗ್ ಆಫರ್‌ಗಳಿಗಾಗಿ ಬಳಸಿಕೊಳ್ಳಬಹುದು.

ಟ್ಯಾಕ್ಸ್‌ಬಡ್ಡಿ ಸಹಯೋಗ, ಪೂರ್ಣ ಸುರಕ್ಷತೆ:

ಈ ಸೇವೆಯನ್ನು ನೋಂದಾಯಿತ ಇ-ರಿಟರ್ನ್ ಇಂಟರ್ಮೀಡಿಯರಿಯಾದ ‘ಟ್ಯಾಕ್ಸ್‌ಬಡ್ಡಿ’ (ಎಸ್‌ಎಸ್‌ ಬಿಎ ಇನ್ನೊವೇಶನ್ಸ್‌ ಲಿಮಿಟೆಡ್) ಸಹಯೋಗದೊಂದಿಗೆ ನೀಡಲಾಗುತ್ತಿದೆ. ಗ್ರಾಹಕರ ಡೇಟಾವನ್ನು ಟ್ಯಾಕ್ಸ್‌ಬಡ್ಡಿಯ ಎನ್‌ಕ್ರಿಪ್ಟ್ ಮಾಡಲಾದ ಫ್ರೇಮ್‌ವರ್ಕ್‌ನಲ್ಲಿ ಮಾತ್ರ ಸುರಕ್ಷಿತವಾಗಿಡಲಾಗುತ್ತದೆ. ಜಿಯೋ ಫೈನಾನ್ಸ್ ಇದನ್ನು ಬೇರೆ ಯಾವುದೇ ಉದ್ದೇಶಕ್ಕೆ ಬಳಸುವುದಿಲ್ಲ. ಇದರಲ್ಲಿ ಬಿಲ್ಟ್‌ ಇನ್‌ ಕಂಪ್ಲಯನ್ಸ್‌ ಟೂಲ್ಸ್‌, ಟ್ಯಾಕ್ಸ್‌ ಪ್ಲಾನರ್‌ ಹಾಗೂ 80ಸಿ ಮತ್ತು 80ಡಿ ಅಡಿಯಲ್ಲಿ ತೆರಿಗೆ ಕಡಿತ ಪಡೆಯುವ ವೃತ್ತಿಪರ ಸಲಹೆಗಳು ಸೇರಿವೆ.

ಉಚಿತ ನೋಟಿಸ್ ನಿರ್ವಹಣೆ:

ತಜ್ಞರ ನೆರವಿನ ಆಯ್ಕೆಯನ್ನು ಪಡೆಯುವ ಗ್ರಾಹಕರಿಗೆ ಉಚಿತ ನೋಟಿಸ್ ನಿರ್ವಹಣೆಯ ಸೌಲಭ್ಯ ಸಿಗಲಿದೆ. ಐಟಿಆರ್ ಸಲ್ಲಿಕೆಯ ನಂತರ ಆದಾಯ ತೆರಿಗೆ ಇಲಾಖೆಯಿಂದ ಯಾವುದೇ ಅಧಿಕೃತ ನೋಟಿಸ್ ಬಂದರೂ, ಟ್ಯಾಕ್ಸ್‌ಬಡ್ಡಿ ತಂಡವು ಯಾವುದೇ ಹೆಚ್ಚುವರಿ ಶುಲ್ಕವಿಲ್ಲದೆ ಅದಕ್ಕೆ ಉತ್ತರಿಸುವ ಪ್ರಕ್ರಿಯೆಯನ್ನು ನಿರ್ವಹಿಸಲಿದೆ ಎಂದು ಸಂಸ್ಥೆ ತಿಳಿಸಿದೆ. ಸಾಂಪ್ರದಾಯಿಕ ಅಡೆತಡೆ ಹಾಗೂ ಹೆಚ್ಚಿನ ವೆಚ್ಚವನ್ನು ಕಡಿಮೆ ಮಾಡುವುದೇ ಇದರ ಮುಖ್ಯ ಉದ್ದೇಶ ಎಂದು ಜಿಯೋ ಫೈನಾನ್ಸ್‌ನ ಸಿಇಒ ಸುರ್ಭೆ ಎಸ್. ಶರ್ಮಾ ತಿಳಿಸಿದ್ದಾರೆ.

ಜಾಗತಿಕ ಕನ್ನಡಿಗರ ಅಚ್ಚುಮೆಚ್ಚಿನ ಸುದ್ದಿತಾಣ ಮಹಾನಾಯಕ ಸುದ್ದಿಗಳನ್ನು ನಿಮ್ಮ ವಾಟ್ಸಾಪ್ ಗ್ರೂಪ್ ಗಳಿಗೆ ಕಳುಹಿಸಬೇಕೇ? ಹಾಗಿದ್ದರೆ, ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 9686399493 ನಂಬರ್ ಸೇರಿಸಿ.

ಗ್ರೂಪ್ ಗೆ ಜಾಯಿನ್ ಆಗಿ:

https://chat.whatsapp.com/H1duNIQRfXnJcfQKWPzNqD