ನಮ್ಮ ದೇಹದ ಜೀರ್ಣಕ್ರಿಯೆ ಮತ್ತು ಹೊಟ್ಟೆಯ ಆರೋಗ್ಯ (Gut Health) ಕೇವಲ ಆಹಾರ ಜೀರ್ಣಿಸುವುದಕ್ಕೆ ಮಾತ್ರ ಸೀಮಿತವಾಗಿಲ್ಲ. ಇದು ನಮ್ಮ ಶಕ್ತಿ, ರೋಗನಿರೋಧಕ ಶಕ್ತಿ, ಚರ್ಮದ ಕಾಂತಿ ಹಾಗೂ ಮಾನಸಿಕ ಸ್ಥಿತಿಯ (Mood) ಮೇಲೆಯೂ ನೇರ ಪರಿಣಾಮ ಬೀರುತ್ತದೆ. ಹೊಟ್ಟೆಯ ಆರೋಗ್ಯವನ್ನು ಕಾಪಾಡಿಕೊಳ್ಳಲು ಕಟ್ಟುನಿಟ್ಟಿನ ಡಯಟ್ ಮಾಡುವ ಅಗತ್ಯವಿಲ್ಲ; ಬದಲಿಗೆ ದಿನನಿತ್ಯದ ಆಹಾರದಲ್ಲಿ ಕೆಲವು ಸರಳ ಬದಲಾವಣೆಗಳನ್ನು (ಫುಡ್ ಸ್ವಾಪ್ – Food Swaps) ಮಾಡಿಕೊಂಡರೆ ಸಾಕು.

ಜೀರ್ಣಕ್ರಿಯೆ ಉತ್ತಮಗೊಳಿಸಲು ಮತ್ತು ಹೊಟ್ಟೆಯ ಆರೋಗ್ಯ ಹೆಚ್ಚಿಸಲು ನೆರವಾಗುವ 5 ಮುಖ್ಯ ಆಹಾರ ಪರ್ಯಾಯಗಳು ಇಲ್ಲಿವೆ:

ವೈಟ್ ಬ್ರೆಡ್ ಬದಲಿಗೆ ‘ಹೋಲ್ ಗ್ರೇನ್ ಬ್ರೆಡ್’ (Whole Grain Bread)

ಮೈದಾದಿಂದ ತಯಾರಾಗುವ ವೈಟ್ ಬ್ರೆಡ್ ಸಂಸ್ಕರಿಸಿದ (Processed) ಆಹಾರವಾಗಿದ್ದು, ಇದರಲ್ಲಿ ನಾರಿನಂಶ (Fiber) ತುಂಬಾ ಕಡಿಮೆ ಇರುತ್ತದೆ. ಇದಕ್ಕೆ ಪರ್ಯಾಯವಾಗಿ ಧಾನ್ಯಗಳಿಂದ ಕೂಡಿದ ‘ಹೋಲ್ ಗ್ರೇನ್ ಬ್ರೆಡ್’ ಬಳಸುವುದು ಒಳ್ಳೆಯದು. ಇದರಲ್ಲಿರುವ ನಾರಿನಂಶವು ಹೊಟ್ಟೆಯಲ್ಲಿರುವ ಒಳ್ಳೆಯ ಬ್ಯಾಕ್ಟೀರಿಯಾಗಳಿಗೆ ಸಹಾಯ ಮಾಡುತ್ತದೆ ಮತ್ತು ಜೀರ್ಣಕ್ರಿಯೆಯನ್ನು ಸರಳಗೊಳಿಸುತ್ತದೆ.

ಸಿಹಿ ಪಾನೀಯಗಳ ಬದಲಿಗೆ ‘ಮಜ್ಜಿಗೆ ಅಥವಾ ಎಳನೀರು’

ಸೋಡಾ, ತಂಪು ಪಾನೀಯಗಳು ಮತ್ತು ಪ್ಯಾಕ್ ಮಾಡಿದ ಹಣ್ಣಿನ ರಸಗಳಲ್ಲಿ ಹೆಚ್ಚಿನ ಪ್ರಮಾಣದ ಸಕ್ಕರೆ ಇರುತ್ತದೆ, ಇದು ಹೊಟ್ಟೆಯ ಸೂಕ್ಷ್ಮಸಸ್ಯವರ್ಗದ (Gut Microflora) ಸಮತೋಲನವನ್ನು ಹಾಳುಮಾಡುತ್ತದೆ. ಇವುಗಳ ಬದಲಿಗೆ ಮಜ್ಜಿಗೆ ಅಥವಾ ಎಳನೀರು ಕುಡಿಯುವುದು ಸೂಕ್ತ. ಮಜ್ಜಿಗೆಯಲ್ಲಿರುವ ಪ್ರೊಬಯೋಟಿಕ್ಸ್ ಜೀರ್ಣಕ್ರಿಯೆಗೆ ನೆರವಾದರೆ, ಎಳನೀರು ದೇಹವನ್ನು ಹೈಡ್ರೇಟ್ ಆಗಿಡಲು ಸಹಾಯ ಮಾಡುತ್ತದೆ.

ಫ್ಲೇವರ್ಡ್ ಮೊಸರಿನ (Flavored Yogurt) ಬದಲು ‘ಸಾಧಾರಣ ಮೊಸರು’ (Plain Curd)

ಮಾರುಕಟ್ಟೆಯಲ್ಲಿ ಸಿಗುವ ಕೃತಕ ಸುವಾಸನೆ ಮತ್ತು ಸಕ್ಕರೆ ಬೆರೆಸಿದ ಯೋಗರ್ಟ್‌ಗಳಿಗಿಂತ ಮನೆಯಲ್ಲಿ ತಯಾರಿಸಿದ ಸಾಧಾರಣ ಮೊಸರು ಆರೋಗ್ಯಕ್ಕೆ ಅತ್ಯುತ್ತಮ. ಮೊಸರಿನಲ್ಲಿ ನೈಸರ್ಗಿಕ ಪ್ರೊಬಯೋಟಿಕ್ಸ್‌ಗಳಿದ್ದು, ಜೀರ್ಣಕ್ರಿಯೆಯನ್ನು ಸುಲಭಗೊಳಿಸುತ್ತವೆ. ಹೆಚ್ಚಿನ ಪೋಷಕಾಂಶಗಳಿಗಾಗಿ ಮೊಸರಿಗೆ ತಾಜಾ ಹಣ್ಣುಗಳು ಅಥವಾ ಬೀಜಗಳನ್ನು (Seeds) ಸೇರಿಸಿ ಸೇವಿಸಬಹುದು.

ಇನ್‌ ಸ್ಟಂಟ್ ನೂಡಲ್ಸ್ ಬದಲು ‘ಮನೆಯಲ್ಲೇ ತಯಾರಿಸಿದ ಆಹಾರ’

ಇನ್‌ಸ್ಟಂಟ್ ನೂಡಲ್ಸ್ ಮತ್ತು ಇತರ ಸಂಸ್ಕರಿಸಿದ ಆಹಾರಗಳಲ್ಲಿ ಅಧಿಕ ಪ್ರಮಾಣದ ಸೋಡಿಯಂ ಹಾಗೂ ಪ್ರಿಸರ್ವೇಟಿವ್‌ಗಳಿರುತ್ತವೆ. ಇವುಗಳ ಬದಲಾಗಿ ಮನೆಯಲ್ಲಿ ತಯಾರಿಸಿದ ಬಿಸಿ ಬಿಸಿ ಅನ್ನ, ಬೇಳೆ ಸಾರು ಹಾಗೂ ತರಕಾರಿಗಳನ್ನು ಸೇವಿಸುವುದು ಜೀರ್ಣಾಂಗವ್ಯೂಹಕ್ಕೆ ಹಿತಕರ. ಇವು ತಾಜಾವಾಗಿದ್ದು, ದೇಹಕ್ಕೆ ಅಗತ್ಯವಾದ ಪೋಷಕಾಂಶಗಳನ್ನು ನೀಡುತ್ತವೆ.

ಐಸ್‌ ಕ್ರೀಮ್‌ ಗೆ ಪರ್ಯಾಯವಾಗಿ ‘ಹಣ್ಣುಗಳು ಮತ್ತು ಫ್ರೋಜನ್ ಯೋಗರ್ಟ್’

ಸಾಧಾರಣ ಐಸ್‌ ಕ್ರೀಮ್‌ ಗಳಲ್ಲಿ ಹೆಚ್ಚಿನ ಪ್ರಮಾಣದ ಸಕ್ಕರೆ ಮತ್ತು ಹೆವಿ ಕ್ರೀಮ್ ಇರುವುದರಿಂದ ಇವು ಬೇಗನೆ ಜೀರ್ಣವಾಗುವುದಿಲ್ಲ. ಇದರ ಬದಲಿಗೆ ನೈಸರ್ಗಿಕ ಸಿಹಿ ಹೊಂದಿರುವ ತಾಜಾ ಹಣ್ಣುಗಳು ಅಥವಾ ಹಣ್ಣುಗಳನ್ನು ಬೆರೆಸಿದ ಫ್ರೋಜನ್ ಯೋಗರ್ಟ್ ಸೇವಿಸುವುದು ಹೊಟ್ಟೆಗೆ ಸುಲಭವಾಗಿ ಜೀರ್ಣವಾಗುತ್ತದೆ.

ನೆನಪಿಡಿ: ದೈನಂದಿನ ಆಹಾರ ಕ್ರಮದಲ್ಲಿ ಮಾಡುವ ಈ ಸಣ್ಣ ಬದಲಾವಣೆಗಳು ಸುಲಭ ಜೀರ್ಣಕ್ರಿಯೆಗೆ ದಾರಿ ಮಾಡಿಕೊಡುವುದಲ್ಲದೆ, ಒಟ್ಟಾರೆ ಆರೋಗ್ಯವನ್ನೂ ವೃದ್ಧಿಸುತ್ತವೆ.

ಜಾಗತಿಕ ಕನ್ನಡಿಗರ ಅಚ್ಚುಮೆಚ್ಚಿನ ಸುದ್ದಿತಾಣ ಮಹಾನಾಯಕ ಸುದ್ದಿಗಳನ್ನು ನಿಮ್ಮ ವಾಟ್ಸಾಪ್ ಗ್ರೂಪ್ ಗಳಿಗೆ ಕಳುಹಿಸಬೇಕೇ? ಹಾಗಿದ್ದರೆ, ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 9686399493 ನಂಬರ್ ಸೇರಿಸಿ.

ಗ್ರೂಪ್ ಗೆ ಜಾಯಿನ್ ಆಗಿ:

https://chat.whatsapp.com/H1duNIQRfXnJcfQKWPzNqD