ರಿಯಾದ್ / ಮಕ್ಕಾ: ಸೌದಿ ಅರೇಬಿಯಾದ ಪವಿತ್ರ ನಗರವಾದ ಮಕ್ಕಾದ ಮಸೀದಿಯೊಂದರೊಳಗೆ “ಅನೈತಿಕ ಕೃತ್ಯ” ಎಸಗಿದ ಆರೋಪದ ಮೇಲೆ ಇಬ್ಬರು ಬಾಂಗ್ಲಾದೇಶಿ ಪ್ರಜೆಗಳನ್ನು ಗಲ್ಲಿಗೇರಿಸಲಾಗಿದೆ ಎಂದು ವರದಿಯಾಗಿದೆ. ಸೌದಿ ಒಳಾಡಳಿತ ಸಚಿವಾಲಯವು ಬುಧವಾರ ಈ ಕುರಿತು ಅಧಿಕೃತ ಹೇಳಿಕೆ ಬಿಡುಗಡೆ ಮಾಡಿದೆ.

ಮರಣದಂಡನೆಗೆ ಗುರಿಯಾದವರನ್ನು ನಝೇರುಲ್ ಇಸ್ಲಾಂ ಅಬ್ದುಲ್ ಬಾಸಿರ್ (Nazerul Islam Abdul Basir) ಮತ್ತು ಸಿಟಿ ಅಖ್ತರ್ (Siti Akhtar) ಎಂದು ಗುರುತಿಸಲಾಗಿದೆ. ಸೌದಿ ಭದ್ರತಾ ಸಿಬ್ಬಂದಿ ಇವರನ್ನು ಬಂಧಿಸಿ ವಿಚಾರಣೆ ನಡೆಸಿ ಸಮರ್ಥ ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದರು. ವಿಚಾರಣೆಯಲ್ಲಿ ಆರೋಪ ಸಾಬೀತಾದ ಬಳಿಕ ನ್ಯಾಯಾಲಯವು ಮರಣದಂಡನೆ ವಿಧಿಸಿತ್ತು.

‘ತಾಝೀರ್’ (Ta’zir) ಕಾನೂನಿನಡಿ ಶಿಕ್ಷೆ:

ಇಸ್ಲಾಮಿಕ್ ಶರಿಯಾ ಕಾನೂನಿನ ಅಡಿಯಲ್ಲಿ ವಿವೇಚನಾಪೂರ್ಣ ಶಿಕ್ಷೆಯಾದ ‘ತಾಝೀರ್’ ಅಡಿಯಲ್ಲಿ ಈ ಮರಣದಂಡನೆ ಜಾರಿಗೊಳಿಸಲಾಗಿದೆ. ಮಸೀದಿಯ ಸಮಯ ಮತ್ತು ಸ್ಥಳದ ಪಾವಿತ್ರ್ಯತೆಯನ್ನು ಉಲ್ಲಂಘಿಸಿ ಗಂಭೀರ ಅಪರಾಧ ಎಸಗಿರುವುದಾಗಿ ಸಚಿವಾಲಯ ತಿಳಿಸಿದೆ. ರಾಜಮನೆತನದ ಆದೇಶದ ಮೇರೆಗೆ ಅಂತಿಮವಾಗಿ ಈ ಶಿಕ್ಷೆಯನ್ನು ಜಾರಿಗೊಳಿಸಲಾಗಿದೆ. ಆದರೆ, ಆರೋಪಿಗಳು ಮಸೀದಿಯೊಳಗೆ ನಿಖರವಾಗಿ ಯಾವ ಕೃತ್ಯ ಎಸಗಿದ್ದರು ಎಂಬುದರ ಕುರಿತು ಸೌದಿ ಅಧಿಕಾರಿಗಳು ಯಾವುದೇ ವಿವರಣೆ ನೀಡಿಲ್ಲ.

ಬಾಂಗ್ಲಾದೇಶದ ಕಾನ್ಸುಲೇಟ್ ಕಚೇರಿಯಿಂದ ಆಕ್ಷೇಪ:

ತಮ್ಮ ದೇಶದ ಪ್ರಜೆಗಳಿಗೆ ಮರಣದಂಡನೆ ವಿಧಿಸುವ ಅಥವಾ ಗಲ್ಲಿಗೇರಿಸುವ ಮುನ್ನ ಜೆಡ್ಡಾದಲ್ಲಿರುವ ಬಾಂಗ್ಲಾದೇಶದ ಕಾನ್ಸುಲೇಟ್ ಕಚೇರಿಗೆ ಯಾವುದೇ ಮುಂಚಿತವಾಗಿ ಮಾಹಿತಿ ನೀಡಿಲ್ಲ ಎಂದು ಬಾಂಗ್ಲಾ ರಾಯಭಾರ ಕಚೇರಿಯ ಅಧಿಕಾರಿಗಳು ತಿಳಿಸಿದ್ದಾರೆ. ಈ ಸಂಬಂಧ ಸೌದಿ ವಿದೇಶಾಂಗ ಸಚಿವಾಲಯಕ್ಕೆ ರಾಜತಾಂತ್ರಿಕ ಟಿಪ್ಪಣಿ (Note Verbale) ಸಲ್ಲಿಸಿ ಈ ಕುರಿತು ಅಧಿಕೃತ ಮಾಹಿತಿ ಹಾಗೂ ಸ್ಪಷ್ಟನೆ ಕೋರಲಾಗಿದೆ.